luu ke mausam men bahaaron ki havaa maangte hain

Loo ke mausam men bahaaron kee havaa maangte hain Ham kaf-e-dast-e-khizaan par bhee hinaa maangte hain Ham-nasheen saada-dilee-haa-e-tamannaa mat poochh Be-vafaaon se vafaaon kaa sila maangte hain Kaash kar lete kabhi ka.aba-e-dil kaa bhee tavaaf Wo jo patthar ke makaanon se khuda maangte hain Jis men ho satvat-e-shaaheen kee parvaaz kaa rang Lab-e-shaa.ir se wo bulbul kee navaa maangte hain Taaki Dunya pe khule un kaa fareb-e-insaaf Be-khataa ho ke khataaon kee sazaa maangte hain Teergee jitnee baDhe husn ho afzoon teraa Kahkashaan maang men maathe pe ziyaa maangte hain Ye hai vaaraftagee-e-shauq kaa aalam 'sardaar' Baarish-e-sang hai aur baad-e-sabaa maangte hain