masti e rindaana ham sairaabi e mai khaana ham

Masti-e-rindaana ham sairaabi-e-mai-khaana ham Gardish-e-taqdeer se hain gardish-e-paimaana ham Khoon-e-dil se chashm-e-tar tak chashm-e-tar se taa-ba-khaak Kar ga.e aakhir gul-o-gulzaar har veeraana ham Kya balaa jabr-e-aseeree hai ki aazaadee men bhee Dosh par apne liye phirte hain zindaan-khaana ham Raah men faujon ke pahre sar pe talvaaron kee Chaaon Aa.e hain zindaan men bhee baa-shaukat-e-shaahaana ham MiTte miTte de ga.e ham zindagee ko rang-o-noor Rafta rafta ban ga.e is ahd kaa afsaana ham Yaa jagaa dete hain zarron ke dilon men mai-kade Yaa banaa lete hain mehr-o-maah ko paimaana ham Qaid ho kar aur bhee zindaan men uDtaa hai khayaal Raqs zanjeeron men bhee karte hain aazaadaana ham