mausam e rang bhi hai fasl e khizaan bhi taarii

Mausam-e-rang bhee hai fasl-e-khizaan bhee taaree Dekhnaa Khoon ke dhabbe hain ki hai gul-kaaree Us se har tarah se tazleel-e-bashar hotee hai Baa.is-e-fakhr naheen muflisee-o-naa-daaree Inqilaabee ho to hai faqr bhee tauqeer-e-hayaat Varna hai aajizee-o-be-kasee-o-ayyaaree Sho.ala-e-gul kee baDhaa detee hai lau-e-baad-e-bahaar Tah-e-shabnam bhee dahak uThtee hai ik chingaaree Lamha lamha hai ki hai qaafila-e-manzil-e-noor Sarhad-e-shab men bhee farmaan-e-sahar hai jaaree Tegh-o-khanjar ko ataa karte hain lafzon kee niyaam Zulm kee karte hain jab ahl-e-sitam tayyaaree Harf-e-'sardaar' men posheeda hain asraar-e-hayaat Sher-e-'sardaar' men hai sarkashee-o-sar-shaaree Sher-e-'sardaar' men hai sho.ala-e-be-baak kaa rang Harf-e-'sardaar' men haq-goee-o-khush-guftaaree