sard hain dil aatish e ruu e nigaaraan chaahiye
— Ali Sardar Jafri
Sard hain dil aatish-e-roo-e-nigaaraan chaahiye
Sho.ala-rang-e-bahaar-e-gul-ezaaraan chaahiye
Manzil-e-ishq-o-junoon ke faasle hain sar-ba-kaf
In kaThin raahon men lutf-e-dast-e-yaaraan chaahiye
KaT rahi hai aur kaT chuktee nahin fasl-e-khizaan
Tez-tar ik aur tegh-e-nau-bahaaraan chaahiye
Aaj mai-khaane men sehr-e-chashm-e-saaqee ke liye
Iltifaat-e-chashm mast-e-mai-gusaaraan chaahiye
Is dil-e-vahshee kee aazaadee kaa kya kiije ilaaj
Ik kamand-e-gesoo-e-yazdaan-shikaaraan chaahiye
Naghma ban jaataa hai naala un kee bazm-e-naaz men
Un ko khush rakhne ko shor-e-sogvaaraan chaahiye
Aasmaanon se baraste hain zameen par regzaar
Aaj phir 'sardaar' raqs-e-barq-o-baaraan chaahiye