shaikast e shauq ko takmiil e aarzoo kahiye
— Ali Sardar Jafri
Shaikast-e-shauq ko takmeel-e-aarzoo kahiye
Jo tishnagee ho to paimaana-o-suboo kahiye
Khayaal-e-yaar ko deejiye visaal-e-yaar kaa naam
Shab-e-firaaq ko gaisu-e-mushk-boo kahiye
Charaagh-e-anjuman-e-hairat-e-nazaara the
Wo laala-roo jinhen ab daagh-e-aarzoo kahiye
Mahak rahi hai ghazal zikr-e-zulf-e-khoobaan se
Naseem-e-sub.h kee maanind koo-ba-koo kahiye
Shikaayaten bhee bahut hain hikaayaten bhee bahut
Mazaa to jab hai ki yaaron ke roo-ba-roo kahiye
Ba-hukm keejiye phir khanjaron kee dildaaree
Dahaan-e-zakhm se afsaana-e-guloo kahiye