sitaaron ke payaam aae bahaaron ke salaam aae

Sitaaron ke payaam aa.e bahaaron ke salaam aa.e Hazaaron naama-haa-e-shauq ahl-e-dil ke kaam aa.e Na jaane kitnee nazren us dil-e-vahshee pe paDtee hain Har ik ko fikr hai us kee ye shaaheen zer-e-daam aa.e Isee ummeed men betaabi-e-jaan baDhtee jaatee hai Sukoon-e-dil jahaan mumkin ho shaayad wo maqaam aa.e Hamaaree tishnagee bujhtee naheen shabnam ke qatron se Jise saaqee-garee kee sharm ho aatish-ba-jaam aa.e Koee shaayad hamaare daagh-e-dil kee tarah raushan ho Hazaaron aaftaab is shauq men baalaa-e-baam aa.e Inhen raahon men shaikh-o-muhtasib haa.il rahe aksar Inhen raahon men hooraan-e-bahishtee ke khiyaam aa.e Nigaahen muntazir hain ek khursheed-e-tamannaa kee Abhee tak jitne mehr-o-maah aa.e naa-tamaam aa.e Ye aalam lazzat-e-takhleeq kaa hai raqs-e-laafaanee Tasavvur-khaana-e-hairat men laakhon sub.h-o-shaam aa.e Koee 'sardaar' kab thaa is se pahle teree mahfil men Bahut ahl-e-sukhan uTThe bahut ahl-e-kalaam aa.e