tiin sharaabii zikr nahin ye farzaanon kaa

Zikr nahin ye farzaanon kaa Qissa hai ik deevaanon kaa Masco, paris aur london men Dekhe main ne tiin sharaabee Surkh thiin aankhen ruuh gulaabee Nashsha-e-mai kaa taaj jabeen par Fikr falak par paanv zameen par Be-khabar apnee laghzish-e-paa se Baa-khabar apne ahd-e-wafa se Dukhtar-e-raz ke dar ke bhikaaree Apne qalb o nazar ke shikaaree Pee lene ke ba.ad bhee pyaase Jaam kee soorat chhalke chhalke Abr kee soorat halke halke Mastee kee talvaar uThaa.e Fasl-e-gul chehron pe khilaa.e Qadam qadam par bahak rahe the Mahak rahe the chahak rahe the Ek ne shaayad whiskey pee thee Doosre ne shampain kee botal Teesare ne wo pighlee chaandee Vodka kee sayyaal haseena Vo shai jis kee taabish-e-rukh se Sheeshe ko aa jaa.e paseena Main ne un naazuk lamhon men Rooh-e-bashar ko uryaan dekhaa Ahd-e-khizaan kaa rang-e-pareedan Rang-e-ahd-e-bahaaraan dekhaa Zaahir dekhaa pinhaan dekhaa Zikr nahin ye farzaanon kaa Qissa hai ik deevaanon kaa Raat ne apnee kaalee zabaan se Khuun shafaq ke dil kaa chaaTaa Chaar taraf khaamoshee chhaa.ee Phail gaya har-soo sannaaTaa Jannat-e-paris ke pahloo men Seine kee maujon ko niind aa.ee Dasne lagee mujh ko tanhaa.ee Mai-khaane men jaa kar main ne Aag se dil kee pyaas bujhaa.ee Rind bahut the lekin wo sab Apne nashe men kho.e hue the Jaag rahi thiin aankhen lekin Dil to sab ke so.e hue the Koee nahin tha un men meraa Men ye baiThaa soch raha tha Kab ye zaalim raat kaTegee Kab vaapas aa.egaa saveraa Itne men ik qaamat-e-ra.anaa Qadam qadam par phuul khilaataa HonTon se ma.asoom tabassum Aankhon se bijlee barsaataa Mai-khaane men jhuum ke aayaa Naaz o adaa ke daam bichhaataa Aish o tarab kee mahboobaayen Nashsha-e-mai kee dosheezaa.en Rah ga.iin apnee aankhen mal kar Aa.ee qayaamat chaal men Dhal kar Sikkon kee jhankaar pe gaatee Sone kee talvaar nachaatee Apne lahoo men aap nahaatee Is naazuk lamhe men main ne Hirs-o-havas ko raqsaan dekhaa Zad men nizaam-e-zardaaree kee Rooh-e-bashar ko larzaan dekhaa Majbooree ko uryaan dekhaa Zikr nahin ye farzaanon kaa Qissa hai ik deevaanon kaa Gahre kohre kee lahron men Saaraa london Doob gaya tha Lamhon kee raushan aankhon men Shaam kaa kaajal phail chukaa tha Raat kee niilee devee jaagee Din ke devtaa ko niind aa.ee Dasne lagee mujh ko tanhaa.ee Mai-khaane men jaa kar main ne Aag se dil kee pyaas bujhaa.ee Us mahfil men sab hee kuch tha Saaqee bhee aur peer-e-mughaan bhee Sahbaa kee aaghosh ke paale Tiflak-e-mastee rind-e-javaan bhee Ghaaza o rang kee ma.ashooqaa.en Jin kee lataafat shab bhar kee thee Itr aur resham kee meenaa.en Jin kee sahbaa lab bhar kee thee Aaj kaa sukh tha, kal kaa dukh tha Aaj kee aashaa, kal kee niraashaa Hans hans kar gham dekh rahe the In jhooTee khushiyon kaa tamaashaa Naa-ummeedee ke kaandhon par Rakkhaa tha ummeed kaa laasha Aaj wo le len, jo mil jaa.e Kal kya hogaa kaun bataa.e Aaj dilon kee sham.a jalaa.en Kal shaayad ye raat na aa.e Aaj to mai kee kashtee khe len Kal ye safeena Doob na jaa.e Aaj labon kaa bosa le len Maut kaa bosa kal lenaa hai Aaj dilon kaa qarz chukaa len Kal to sab kuch de denaa hai Is naazuk lamhe men main ne Rooh-e-bashar ko veeraan dekhaa Atom-bomb ke khauf ke aage Aql o khirad ko hairaan dekhaa Saare jahaan ko larzaan dekhaa Zikr nahin ye farzaanon kaa Qissa hai ik deevaanon kaa Dosh-e-havaa par taareekee ne Zulfon ke kham khol diye the Masco kee khaamosh fazaa men Raat kee aankhon ke kaajal ne Kitne jaadoo ghol diye the Surkh o siyah makhmal ke uupar Shaam ke saayon ko niind aa.ee Dasne lagee mujh ko tanhaa.ee Mai-khaane men jaa kar main ne Aag se dil kee pyaas bujhaa.ee Khush-fikron kaa abr-e-bahaaraan Jhuum paDaa tha mai-khaanon par Baada-kashon kaa rangeen jhurmuT TuuT paDaa tha paimaanon par Saaz kee lai men tezee aa.ee Nashsha-e-mai kee Angdhaai ne Apnaa haseen parcham lahraayaa Chappa chappa zarra zarra Qatra qatra raqs men aayaa Naghmon ke be-taab bhanvar ko Lab ke TukDe chuum rahe the Raqs ke bekal girdaabon men Jism ke toofaan ghuum rahe the Chehron kee raushan qindeelen Baanhon kee dil-kash mehraaben Raag nazar kee khaamoshee ke Jumbish-e-mizhgaan kee mizraaben Is gardish men darham-barham Saaraa nizaam-e-shams-o-qamar tha Pighal ga.e the chaand aur suraj Mahfil-e-gul men raqs-e-sharar tha Raat kee peshaanee se jaise Taaron kaa jhoomar Toot gaya ho Peer-e-falak ke haath se jaise Tasht-e-zamarrud chhooT gaya ho Heere, neelam, la.al aur motee Khaak pe jaise bikhar rahe hain Jaise kisee ke barham gesoo Bikhar bikhar kar sanvar rahe hon Nashsha-e-mai ke sar par lekin Aql o khirad kaa taaj dharaa tha Duur se baiThaa baiThaa mujh ko Ek sharaabee dekh raha tha Us ne havaa men haath se apne Nanhaa saa ik bosa phenkaa Ik titlee see uDtee aa.ee Mere dil ke phuul ke uupar Kuchh kaanpee aur kuch manDlaa.ee BaiTh ga.ee par joD ke donon Pyaar ke ras ko chuus ke uTThee Aur miree jaanib se havaa men Bosa ban kar phir lahraa.ee Kuchh sharmaa.ee, kuch itraa.ee Aur sharaabee mez se uTh kar Raqs ke halqon se Takraataa Kashtee kee soorat chakraataa Haath men apna jaam uThaa.e Meree jaanib jhoomtaa aayaa Khandaan khandaan, naazaan naazaan Raqsaan raqsaan, pechaan pechaan Mauj-e-havaa ko choomtaa aayaa Meree zabaan thee urdu, hindee Us kee zabaan thee ruusee lekin Ek zabaan thee aisi bhee jo Donon zabaanon se pyaaree thee Donon jis ko bol rahe the Chand ishaare chand tabassum Nazron kaa khaamosh takallum Harf yahee the, lafz yahee the Shahad jo dil men ghol rahe the Hind kee mastee, ruus kaa naqsha Donon ne ik jaam banaayaa Aur havaa men us ko nachaayaa Saath hamaare sab rindon ne Apne dilon ko haath men le kar Mere vatan kaa jaam uThaayaa Ab jo main ne muD kar dekhaa Jashn na tha ye deevaanon kaa Gird hamaare amn kee devee Giit kee hooren saaz kee pariyaan Naghme aur awaaz kee laDiyaan Paris kee bad-bakht haseena Maghroor america kaa sipaahee London kaa badmast sharaabee Aish o tarab kee mahboobaa.en Nashsha-e-mai kee dosheezaa.en Ghaaza o rang kee mashooqaa.en Itr aur resham kee meenaa.en 'haafiz' aur 'ghaalib' kee ghazlen 'pushkin' aur 'tagore' kee nazmen Kitne naaz aur kitnee adaa.en Kitnee sheereen aur lailaa.en Kitne raanjhe, kitnee heeren Kitne but, kitnee tasveeren Amn kee koshish aur tadbeeren Mashriq o maghrib kee taqdeeren Halqa baandhe naach rahi thiin Main ne is naazuk lamhe men Rooh-e-bashar ko naazaan dekhaa Nashsha o raqs ke pech o kham men Pyaar kaa jazba raqsaan dekhaa Saare jahaan ko khandaan dekhaa Zikr nahin ye farzaanon kaa Qissa hai ik deevaanon kaa Zikr nahin ye farzanon ka Qissa hai ek diwanon ka Masco, paris aur london mein Dekhe main ne tin sharabi SurKH thin aankhen ruh gulabi Nashsha-e-mai ka taj jabin par Fikr falak par panw zamin par Be-KHabar apni laghzish-e-pa se Ba-KHabar apne ahd-e-wafa se DuKHtar-e-raz ke dar ke bhikari Apne qalb o nazar ke shikari Pi lene ke baad bhi pyase Jam ki surat chhalke chhalke Abr ki surat halke halke Masti ki talwar uThae Fasl-e-gul chehron pe khilae Qadam qadam par bahak rahe the Mahak rahe the chahak rahe the Ek ne shayad whiskey pi thi Dusre ne shampain ki botal Tisare ne wo pighli chandi Wodka ki sayyal hasina Wo shai jis ki tabish-e-ruKH se Shishe ko aa jae pasina Main ne un nazuk lamhon mein Ruh-e-bashar ko uryan dekha Ahd-e-KHizan ka rang-e-paridan Rang-e-ahd-e-bahaaran dekha Zahir dekha pinhan dekha Zikr nahin ye farzanon ka Qissa hai ek diwanon ka Raat ne apni kali zaban se KHun shafaq ke dil ka chaTa Chaar taraf KHamoshi chhai Phail gaya har-su sannaTa Jannat-e-paris ke pahlu mein Seine ki maujon ko nind aai Dasne lagi mujh ko tanhai Mai-KHane mein ja kar main ne Aag se dil ki pyas bujhai Rind bahut the lekin wo sab Apne nashe mein khoe hue the Jag rahi thin aankhen lekin Dil to sab ke soe hue the Koi nahin tha un mein mera Mein ye baiTha soch raha tha Kab ye zalim raat kaTegi Kab wapas aaega sawera Itne mein ek qamat-e-rana Qadam qadam par phul khilata HonTon se masum tabassum Aankhon se bijli barsata Mai-KHane mein jhum ke aaya Naz o ada ke dam bichhata Aish o tarab ki mahbubayen Nashsha-e-mai ki doshizaen Rah gain apni aankhen mal kar Aai qayamat chaal mein Dhal kar Sikkon ki jhankar pe gati Sone ki talwar nachati Apne lahu mein aap nahati Is nazuk lamhe mein main ne Hirs-o-hawas ko raqsan dekha Zad mein nizam-e-zardari ki Ruh-e-bashar ko larzan dekha Majburi ko uryan dekha Zikr nahin ye farzanon ka Qissa hai ek diwanon ka Gahre kohre ki lahron mein Sara london Dub gaya tha Lamhon ki raushan aankhon mein Sham ka kajal phail chuka tha Raat ki nili dewi jagi Din ke dewta ko nind aai Dasne lagi mujh ko tanhai Mai-KHane mein ja kar main ne Aag se dil ki pyas bujhai Us mahfil mein sab hi kuch tha Saqi bhi aur pir-e-mughan bhi Sahba ki aaghosh ke pale Tiflak-e-masti rind-e-jawan bhi Ghaza o rang ki mashuqaen Jin ki latafat shab bhar ki thi Itr aur resham ki minaen Jin ki sahba lab bhar ki thi Aaj ka sukh tha, kal ka dukh tha Aaj ki aasha, kal ki nirasha Hans hans kar gham dekh rahe the In jhuTi KHushiyon ka tamasha Na-ummidi ke kandhon par Rakkha tha ummid ka lasha Aaj wo le len, jo mil jae Kal kya hoga kaun batae Aaj dilon ki shama jalaen Kal shayad ye raat na aae Aaj to mai ki kashti khe len Kal ye safina Dub na jae Aaj labon ka bosa le len Maut ka bosa kal lena hai Aaj dilon ka qarz chuka len Kal to sab kuch de dena hai Is nazuk lamhe mein main ne Ruh-e-bashar ko viran dekha Atom-bomb ke KHauf ke aage Aql o KHirad ko hairan dekha Sare jahan ko larzan dekha Zikr nahin ye farzanon ka Qissa hai ek diwanon ka Dosh-e-hawa par tariki ne Zulfon ke KHam khol diye the Masco ki KHamosh faza mein Raat ki aankhon ke kajal ne Kitne jadu ghol diye the SurKH o siyah maKHmal ke upar Sham ke sayon ko nind aai Dasne lagi mujh ko tanhai Mai-KHane mein ja kar main ne Aag se dil ki pyas bujhai KHush-fikron ka abr-e-bahaaran Jhum paDa tha mai-KHanon par Baada-kashon ka rangin jhurmuT TuT paDa tha paimanon par Saz ki lai mein tezi aai Nashsha-e-mai ki angDai ne Apna hasin parcham lahraya Chappa chappa zarra zarra Qatra qatra raqs mein aaya Naghmon ke be-tab bhanwar ko Lab ke TukDe chum rahe the Raqs ke bekal girdabon mein Jism ke tufan ghum rahe the Chehron ki raushan qindilen Banhon ki dil-kash mehraben Rag nazar ki KHamoshi ke Jumbish-e-mizhgan ki mizraben Is gardish mein darham-barham Sara nizam-e-shams-o-qamar tha Pighal gae the chand aur suraj Mahfil-e-gul mein raqs-e-sharar tha Raat ki peshani se jaise Taron ka jhumar TuT gaya ho Pir-e-falak ke hath se jaise Tasht-e-zamarrud chhuT gaya ho Hire, nilam, lal aur moti KHak pe jaise bikhar rahe hain Jaise kisi ke barham gesu Bikhar bikhar kar sanwar rahe hon Nashsha-e-mai ke sar par lekin Aql o KHirad ka taj dhara tha Dur se baiTha baiTha mujh ko Ek sharabi dekh raha tha Us ne hawa mein hath se apne Nanha sa ek bosa phenka Ek titli si uDti aai Mere dil ke phul ke upar Kuchh kanpi aur kuch manDlai BaiTh gai par joD ke donon Pyar ke ras ko chus ke uTThi Aur meri jaanib se hawa mein Bosa ban kar phir lahrai Kuchh sharmai, kuch itrai Aur sharabi mez se uTh kar Raqs ke halqon se Takraata Kashti ki surat chakraata Hath mein apna jam uThae Meri jaanib jhumta aaya KHandan KHandan, nazan nazan Raqsan raqsan, pechan pechan Mauj-e-hawa ko chumta aaya Meri zaban thi urdu, hindi Us ki zaban thi rusi lekin Ek zaban thi aisi bhi jo Donon zabanon se pyari thi Donon jis ko bol rahe the Chand ishaare chand tabassum Nazron ka KHamosh takallum Harf yahi the, lafz yahi the Shahad jo dil mein ghol rahe the Hind ki masti, rus ka naqsha Donon ne ek jam banaya Aur hawa mein us ko nachaya Sath hamare sab rindon ne Apne dilon ko hath mein le kar Mere watan ka jam uThaya Ab jo main ne muD kar dekha Jashn na tha ye diwanon ka Gird hamare amn ki dewi Git ki huren saz ki pariyan Naghme aur aawaz ki laDiyan Paris ki bad-baKHt hasina Maghrur america ka sipahi London ka badmast sharabi Aish o tarab ki mahbubaen Nashsha-e-mai ki doshizaen Ghaza o rang ki mashuqaen Itr aur resham ki minaen 'hafiz' aur 'ghaalib' ki ghazlen 'pushkin' aur 'tagore' ki nazmen Kitne naz aur kitni adaen Kitni shirin aur lailaen Kitne ranjhe, kitni hiren Kitne but, kitni taswiren Amn ki koshish aur tadbiren Mashriq o maghrib ki taqdiren Halqa bandhe nach rahi thin Main ne is nazuk lamhe mein Ruh-e-bashar ko nazan dekha Nashsha o raqs ke pech o KHam mein Pyar ka jazba raqsan dekha Sare jahan ko KHandan dekha Zikr nahin ye farzanon ka Qissa hai ek diwanon ka