tumhaare eajaaz e husn ki mere dil pe laakhon inaayaten hain

Tumhaare e.ajaaz-e-husn kee mere dil pe laakhon inaayaten hain Tumhaaree hee den mere zauq-e-nazar kee saaree lataafaten hain Javaan hai sooraj jabeen pe jis ke tumhaare maathe kee raushnee hai Sahar haseen hai ki us ke rukh par tumhaare rukh kee sabaahaten hain Main jin bahaaron kee parvarish kar raha hoon zindaan-e-gham men hamdam Kisee ke gesoo-o-chashm-o-rukhsaar-o-lab kee rangeen hikaayaten hain Na jaane chhalkaa.e jaam kitne na jaane kitne suboo uchhaale Magar miree tishnagee ki ab bhee tiree nazar se shikaayaten hain Main apnee aankhon men sail-e-ashk-e-ravaan naheen bijliyaan liye hoon Jo sar-buland aur ghayoor hain ahl-e-gham ye un kee rivaayaten hain Main raat kee god men sitaare naheen sharaare bikhertaa hoon Sahar ke dil men jo apne ashkon se bo raha hoon baghaavaten hain Ye shaa.iree-e-nau kee paighambaree zamaane kee daavaree hai Labon pe mere saheefa-e-inqilaab kee surkh aayaten hain