uljhe kaanton se ki khele gul e tar se pahle

Uljhe kaanTon se ki khele gul-e-tar se pahle Fikr ye hai ki sabaa aa.e kidhar se pahle Jaam-o-paimaana-o-saaqee kaa gumaan thaa lekin Deeda-e-tar hee thaa yaan deeda-e-tar se pahle Abr-e-naisaan kee na barakat hai na faizaan-e-bahaar Qatre gum ho ga.e ta.ameer-e-guhar se pahle Jam gaya dil men lahoo suukh ga.e aankhon men ashk Tham gaya dard-e-jigar rang-e-sahar se pahle Qaafile aa.e to the na.aron ke parcham le kar Sar-nigoon ho ga.ee har aah asar se pahle Khoon-e-sar bah gaya maut aa ga.ee deevaanon ko Baarish-e-sang se toofaan-e-sharar se pahle Surkhee-e-khoon-e-tamannaa kee mahak aatee hai Dil koi TuuTaa hai shaayad gul-e-tar se pahle Maqtal-e-shauq ke aadaab niraale hain bahut Dil bhee qaatil ko diyaa karte hain sar se pahle