urdu hamaarii pyaarii zabaan urdu

Hamaaree pyaaree zabaan urdu Hamaaree naghmon kee jaan urdu Haseen dilkash javaan urdu Zabaan wo dhul ke jis ko gangaa ke jal se paakeezgee milee hai Avadh kee ThanDee havaa ke jhonke se jis ke dil kee kalee khilee hai Jo sher-o-naghma ke khuld-zaaron men aaj koyal see kooktee hai Isee zabaan men hamaare bachpan ne maaon se loriyaan sunee hain Javaan ho kar isee zabaan men kahaaniyaan ishq ne kahee hain Isee zabaan ko chamakte heeron se ilm kee jholiyaan bharee hain Isee zabaan se vatan ke honTon ne na.ara-e-inqilaab paayaa Isee se angrez hukmaraanon ne khud-saree kaa javaab paayaa Isee se meree javaan tamannaa ne shaa.eree kaa rabaab paayaa Ye apne naghmaat-e-pur-asar se dilon ko bedaar kar chukee hai Ye apne na.aron kee fauj se dushmanon pe yalghaar kar chukee hai Sitamgaron kee sitamgaree par hazaar-haa vaar kar chukee hai Koee bataao wo kaun saa moD hai jahaan ham jhijak ga.e hain Vo kaun see razm-gaah hai jis men ahl-e-urdu dubak ga.e hain Vo ham nahin hain jo baDh ke maidaan men aa.e hon aur ThiThak ga.e hain Ye wo zabaan hai ki jis ne zindaan kee teergee men diye jalaa.e Ye wo zabaan hai ki jis ke sho.alon se jal ga.e phaansiyon ke saa.e Faraaz-e-daar-o-rasan se bhee ham ne sarfaroshee ke giit gaa.e Kahaa hai kis ne ham apne piyaare vatan men bhee be-vatan rahenge Zabaan chhin jaa.egee hamaare dahan se ham be-sukhan rahenge Ham aaj bhee kal kee tarah dil ke sitaar par naghma-zan rahenge Ye kaisee baad-e-bahaar hai jis men shaakh-e-urdu na phal sakegee Vo kaisaa roo-e-nigaar hogaa na zulf jis par machal sakegee Hamen wo aazaadee chaahiye jis men dil kee miinaa ubal sakegee Hamen ye haq hai ham apnee khaak-e-vatan men apna chaman sajaa.en Hamaaree hai shaakh-e-gul to phir kyuun na us pe ham aashiyaan banaa.en Ham apne andaaz aur apnee zabaan men apne giit gaa.en Kahaan ho matvaalo aao bazm-e-vatan men hai imtihaan hamaaraa Zabaan kee zindagee se vaabasta aaj suud o ziyaan hamaaraa Hamaaree urdu rahegee baaqee agar hai hindostaan hamaaraa Chale hain gang-o-jaman kee vaadee men ham havaa-e-bahaar ban kar Himaaliya se utar rahe hain taraana-e-aabshaar ban kar Ravaan hain hindostaan kee rag rag men Khoon kee surkh dhaar ban kar Hamaaree pyaaree zabaan urdu Hamaaree naghmon kee jaan urdu Haseen, dilkash javaan urdu Hamari pyari zaban urdu Hamari naghmon ki jaan urdu Hasin dilkash jawan urdu Zaban wo dhul ke jis ko ganga ke jal se pakizgi mili hai Awadh ki ThanDi hawa ke jhonke se jis ke dil ki kali khili hai Jo sher-o-naghma ke KHuld-zaron mein aaj koyal si kukti hai Isi zaban mein hamare bachpan ne maon se loriyan suni hain Jawan ho kar isi zaban mein kahaniyan ishq ne kahi hain Isi zaban ko chamakte hiron se ilm ki jholiyan bhari hain Isi zaban se watan ke honTon ne nara-e-inqilab paya Isi se angrez hukmaranon ne KHud-sari ka jawab paya Isi se meri jawan tamanna ne shaeri ka rabab paya Ye apne naghmat-e-pur-asar se dilon ko bedar kar chuki hai Ye apne naron ki fauj se dushmanon pe yalghaar kar chuki hai Sitamgaron ki sitamgari par hazar-ha war kar chuki hai Koi batao wo kaun sa moD hai jahan hum jhijak gae hain Wo kaun si razm-gah hai jis mein ahl-e-urdu dubak gae hain Wo hum nahin hain jo baDh ke maidan mein aae hon aur ThiThak gae hain Ye wo zaban hai ki jis ne zindan ki tirgi mein diye jalae Ye wo zaban hai ki jis ke shoalon se jal gae phansiyon ke sae Faraaz-e-dar-o-rasan se bhi hum ne sarfaroshi ke git gae Kaha hai kis ne hum apne piyare watan mein bhi be-watan rahenge Zaban chhin jaegi hamare dahan se hum be-suKHan rahenge Hum aaj bhi kal ki tarah dil ke sitar par naghma-zan rahenge Ye kaisi baad-e-bahaar hai jis mein shaKH-e-urdu na phal sakegi Wo kaisa ru-e-nigar hoga na zulf jis par machal sakegi Hamein wo aazadi chahiye jis mein dil ki mina ubal sakegi Hamein ye haq hai hum apni KHak-e-watan mein apna chaman sajaen Hamari hai shaKH-e-gul to phir kyun na us pe hum aashiyan banaen Hum apne andaz aur apni zaban mein apne git gaen Kahan ho matwalo aao bazm-e-watan mein hai imtihan hamara Zaban ki zindagi se wabasta aaj sud o ziyan hamara Hamari urdu rahegi baqi agar hai hindostan hamara Chale hain gang-o-jaman ki wadi mein hum hawa-e-bahaar ban kar Himaliya se utar rahe hain tarana-e-abshaar ban kar Rawan hain hindostan ki rag rag mein KHun ki surKH dhaar ban kar Hamari pyari zaban urdu Hamari naghmon ki jaan urdu Hasin, dilkash jawan urdu