wo mirii dost wo hamdard wo gam khvaar aankhen

Wo miree dost wo hamdard wo gham-khvaar aankhen Ek ma.asoom mohabbat kee gunahgaar aankhen Shokh-o-shaadaab-o-haseen saada-o-purkaar aankhen Mast-o-sarshaar-o-javaan be-khud-o-hoshiyaar aankhen Tirchhee nazron men wo uljhee huee sooraj kee kiran Apne duzdeeda ishaaron men giraftaar aankhen Jumbish-e-abroo-o-mizhgaan kai khunuk saa.e men Aatish-afroz junoon-khez sharar-baar aankhen Kaifiyat dil kee sunaatee huee ek ek nigaah Be-zabaan ho ke bhee wo maa.il-e-guftaar aankhen Mausam-e-gul men wo Udhte hue bhaunron kee tarah Ghuncha-e-dil pe wo kartee huee yalghaar aankhen Kabhee chhalkee huee sharbat ke kaToron kee tarah Aur kabhee zahr men Duubee huee talvaar aankhen Kabhee Thahree huee yakh-basta ghamon kee jheelen Kabhee sahmaa huaa simTaa huaa ik pyaar aankhen Kabhee jhukte hue baadal kabhee girtee bijlee Kabhee uThtee huee aamaada-e-paikaar aankhen Nok-e-abroo men kabhee talkhee-e-inkaar liye Kabhee ghole hue sheereenee-e-iqraar aankhen Aanch men apnee javaanee kee sulagtee chitvan Shabnam-e-ashk men dhoee huee gulnaar aankhen Husn ke chaand se mukhDe pe chamakte taare Haa.e aankhen wo hareef-e-lab-o-rukhsaar aankhen Ishva-o-ghamza-o-andaaz-o-adaa par naazaan Apne pindaar-e-javaanee kee parastaar aankhen Ruuh ko rog mohabbat kaa lagaa detee hain Sehat-e-dil jo ataa kartee hain beemaar aankhen Sehn-e-zindaan men hai phir raat ke taaron kaa hujoom Sham.a kee tarah farozaan sar-e-deevaar aankhen