yaad aae hain ahd e junoon ke khoe hue dildaar bahut

Yaad aa.e hain ahd-e-junoon ke kho.e hue dildaar bahut Un se duur basaa.ee bastee jin se hamen thaa pyaar bahut Ek ik kar ke khilee thiin kaliyaan ek ik kar ke phuul ga.e Ek ik kar ke ham se bichhDe baagh-e-jahaan men yaar bahut Husn ke jalve aam hain lekin zauq-e-nazaara aam naheen Ishq bahut mushkil hai lekin ishq ke da.avedaar bahut Zakhm kaho yaa khiltee kaliyaan haath magar guldasta hai Baagh-e-wafa se ham ne chune hain phuul bahut aur khaar bahut Jo bhee milaa hai le aa.e hain daagh-e-dil yaa daagh-e-jigar Vaadee vaadee manzil manzil bhaTke hain 'sardaar' bahut