ye be kas o be qaraar chehre
— Ali Sardar Jafri
Ye be-kas-o-be-qaraar chehre
Sadiyon ke ye sogvaar chehre
MiTTee men paDe damak rahe hain
Heeron kee tarah hazaar chehre
Le jaa ke inhen kahaan sajaa.en
Ye bhuuk ke shikaar chehre
Africa-o-asia kee zeenat
Ye naadir-e-rozgaar chehre
Khoee huee 'azmaton ke vaaris
Kal raat ke yaadgaar chehre
Ghaaze se safed mai se rangeen
Is daur ke daaghdaar chehre
Guzre hain nigaah-o-dil se ho kar
Har tarah ke be-shumaar chehre
Maghroor anaa ke ghonsle men
BaiThe hue kam-ayaar chehre
Qaabil-e-iltifaat aankhen
Naa-qaabil-e-aitbaar chehre
In sab se haseen-tar hain lekin
Rindon ke gunaahgaar chehre