dil soz se khaalii hai nigah paak nahin hai

Dil soz se khaalee hai nigah paak naheen hai Phir is men ajab kya ki too bebaak naheen hai Hai zauq-e-tajallee bhee isee khaak men pinhaan Ghaafil too niraa saahib-e-idraak naheen hai Wo aankh ki hai surma-e-afrang se raushan Purkaar o sukhan-saaz hai namnaak naheen hai Kya suufee o mullaa ko khabar mere junoon kee Un kaa sar-e-daaman bhee abhee chaak naheen hai Kab tak rahe mahkoomi-e-anjum men miree khaak Yaa main naheen yaa gardish-e-aflaak naheen hai Bijlee hoon nazar koh o bayaabaan pe hai meree Mere liye shaayaan khas-o-khaashaak naheen hai Aalam hai faqat momin-e-jaan-baaz kee meeraas Momin naheen jo saahib-e-laulaak naheen hai