himaala ai himaala ai fasiil e kishvar e hindustaan

Ai himaala ai faseel-e-kishvar-e-hindustaan Choomtaa hai teree peshaanee ko jhuk kar aasmaan Tujh men kuch paidaa nahin dereena rozee ke nishaan Too javaan hai gardish-e-shaam-o-sahar ke darmiyaan Ek jalva tha kaleem-e-toor-e-seenaa ke liye Too tajallee hai saraapaa chashm-e-beenaa ke liye Imtihaan-e-deeda-e-zaahir men kohistaan hai too Paasbaan apna hai too deevaar-e-hindustaan hai too Matla-e-avval falak jis kaa ho wo deevaan hai too Soo-e-khalvat-gaah-e-dil daaman-kash-e-insaan hai too Barf ne baandhee hai dastaar-e-fazeelat tere sar Khanda-zan hai jo kulaah-e-mehr-e-aalam-taab par Teree 'umr-e-rafta kee ik aan hai ahd-e-kuhan Vaadiyon men hain tiree kaalee ghaTaa.en khema-zan ChoTiyaan teree surayyaa se hain sargarm-e-sukhan Too zameen par aur pahnaa-e-falak teraa vatan Chashma-e-daaman tiraa aa.eena-e-sayyaal hai Daaman-e-mauj-e-havaa jis ke liye roomaal hai Abr ke haathon men rahvaar-e-havaa ke vaaste Taaziyaana de diyaa barq-e-sar-e-kohsaar ne Ai himaala koi baazee-gaah hai too bhee jise Dast-e-qudrat ne banaayaa hai 'anaasir ke liye Haa.e kya fart-e-tarab men jhoomtaa jaataa hai abr Feel-e-be-zanjeer kee soorat uDaa jaataa hai abr Jumbish-e-mauj-e-naseem-e-sub.h gahvaara banee Jhoomtee hai nashsha-e-hastee men har gul kee kalee Yuun zabaan-e-barg se goyaa hai us kee khaamushee Dast-e-gul-cheen kee jhaTak main ne nahin dekhee kabhi Kah rahi hai meree khaamoshee hee afsaana miraa Kunj-e-khalvat khaana-e-qudrat hai kaashaana miraa Aatee hai naddee faraaz-e-koh se gaatee huee Kausar o tasneem kee maujon ko sharmaatee huee Aa.eena saa shaahid-e-qudrat ko dikhlaatee huee Sang-e-rah se gaah bachtee gaah Takraatee huee ChheDtee jaa is iraaq-e-dil-nasheen ke saaz ko Ai musaafir dil samajhtaa hai tiree awaaz ko Laila-e-shab kholtee hai aa ke jab zulf-e-rasaa Daaman-e-dil kheenchtee hai aabshaaron kee sadaa Vo khamoshee shaam kee jis par takallum ho fidaa Vo darakhton par tafakkur kaa samaan chhaayaa huaa Kaanptaa phirtaa hai kya rang-e-shafaq kohsaar par Khush-numaa lagtaa hai ye ghaaza tire rukhsaar par Ai himaala daastaan us waqt kee koi sunaa Maskan-e-aabaa-e-insaan jab banaa daaman tiraa Kuchh bataa us seedhee-saadhee zindagee kaa maajraa Daagh jis par ghaaza-e-rang-e-taklluf kaa na tha Haan dikhaa de ai tasavvur phir wo sub.h-o-shaam too DauD peechhe kee taraf ai gardish-e-ayyaam too Ai himala ai fasil-e-kishwar-e-hindustan Chumta hai teri peshani ko jhuk kar aasman Tujh mein kuch paida nahin derina rozi ke nishan Tu jawan hai gardish-e-sham-o-sahar ke darmiyan Ek jalwa tha kalim-e-tur-e-sina ke liye Tu tajalli hai sarapa chashm-e-bina ke liye Imtihan-e-dida-e-zahir mein kohistan hai tu Pasban apna hai tu diwar-e-hindustan hai tu Matla-e-awwal falak jis ka ho wo diwan hai tu Su-e-KHalwat-gah-e-dil daman-kash-e-insan hai tu Barf ne bandhi hai dastar-e-fazilat tere sar KHanda-zan hai jo kulah-e-mehr-e-alam-tab par Teri 'umr-e-rafta ki ek aan hai ahd-e-kuhan Wadiyon mein hain teri kali ghaTaen KHema-zan ChoTiyan teri surayya se hain sargarm-e-suKHan Tu zamin par aur pahna-e-falak tera watan Chashma-e-daman tera aaina-e-sayyal hai Daman-e-mauj-e-hawa jis ke liye rumal hai Abr ke hathon mein rahwar-e-hawa ke waste Taziyana de diya barq-e-sar-e-kohsar ne Ai himala koi bazi-gah hai tu bhi jise Dast-e-qudrat ne banaya hai 'anasir ke liye Hae kya fart-e-tarab mein jhumta jata hai abr Fil-e-be-zanjir ki surat uDa jata hai abr Jumbish-e-mauj-e-nasim-e-subh gahwara bani Jhumti hai nashsha-e-hasti mein har gul ki kali Yun zaban-e-barg se goya hai us ki KHamushi Dast-e-gul-chin ki jhaTak main ne nahin dekhi kabhi Kah rahi hai meri KHamoshi hi afsana mera Kunj-e-KHalwat KHana-e-qudrat hai kashana mera Aati hai naddi faraaz-e-koh se gati hui Kausar o tasnim ki maujon ko sharmati hui Aaina sa shahid-e-qudrat ko dikhlati hui Sang-e-rah se gah bachti gah Takraati hui ChheDti ja is iraq-e-dil-nashin ke saz ko Ai musafir dil samajhta hai teri aawaz ko Laila-e-shab kholti hai aa ke jab zulf-e-rasa Daman-e-dil khinchti hai aabshaaron ki sada Wo KHamoshi sham ki jis par takallum ho fida Wo daraKHton par tafakkur ka saman chhaya hua Kanpta phirta hai kya rang-e-shafaq kohsar par KHush-numa lagta hai ye ghaza tere ruKHsar par Ai himala dastan us waqt ki koi suna Maskan-e-aba-e-insan jab bana daman tera Kuchh bata us sidhi-sadhi zindagi ka majra Dagh jis par ghaza-e-rang-e-taklluf ka na tha Han dikha de ai tasawwur phir wo subh-o-sham tu DauD pichhe ki taraf ai gardish-e-ayyam tu