hindustaanii bachchon kaa qaumii giit chishtii ne jis zameen men paigaam e haq sunaayaa

Chishtee ne jis zameen men paighaam-e-haq sunaayaa Naanak ne jis chaman men vahdat kaa giit gaayaa Taataariyon ne jis ko apna vatan banaayaa Jis ne hijaaziyon se dasht-e-arab chhuDaayaa Meraa vatan vahee hai meraa vatan vahee hai Yunaaniyon ko jis ne hairaan kar diyaa tha Saare jahaan ko jis ne ilm o hunar diyaa tha MiTTee ko jis kee haq ne zar kaa asar diyaa tha Turkon kaa jis ne daaman heeron se bhar diyaa tha Meraa vatan vahee hai meraa vatan vahee hai TuuTe the jo sitaare faaras ke aasmaan se Phir taab de ke jis ne chamkaa.e kahkashaan se Vahdat kee lai sunee thee dunya ne jis makaan se Meer-e-arab ko aa.ee ThanDee havaa jahaan se Meraa vatan vahee hai meraa vatan vahee hai Bande kaleem jis ke parbat jahaan ke siinaa Nooh-e-nabee kaa aa kar Thahraa jahaan safeenaa Rif.at hai jis zameen kee baam-e-falak kaa ziinaa Jannat kee zindagee hai jis kee fazaa men jiinaa Meraa vatan vahee hai meraa vatan vahee hai Chishti ne jis zamin mein paigham-e-haq sunaya Nanak ne jis chaman mein wahdat ka git gaya Tatariyon ne jis ko apna watan banaya Jis ne hijaziyon se dasht-e-arab chhuDaya Mera watan wahi hai mera watan wahi hai Yunaniyon ko jis ne hairan kar diya tha Sare jahan ko jis ne ilm o hunar diya tha MiTTi ko jis ki haq ne zar ka asar diya tha Turkon ka jis ne daman hiron se bhar diya tha Mera watan wahi hai mera watan wahi hai TuTe the jo sitare faras ke aasman se Phir tab de ke jis ne chamkae kahkashan se Wahdat ki lai suni thi duniya ne jis makan se Mir-e-arab ko aai ThanDi hawa jahan se Mera watan wahi hai mera watan wahi hai Bande kalim jis ke parbat jahan ke sina Nuh-e-nabi ka aa kar Thahra jahan safina Rifat hai jis zamin ki baam-e-falak ka zina Jannat ki zindagi hai jis ki faza mein jina Mera watan wahi hai mera watan wahi hai