ibliis ki majlis e shuuraa ibliis

Iblees Ye anaasir kaa puraanaa khel ye dunya-e-doon Saakinaan-e-arsh-e-aazam kee tamannaaon kaa Khoon Is kee barbaadee pe aaj aamaada hai wo kaarsaaz Jis ne is kaa naam rakhaa tha jahaan-e-kaaf-o-noon Main ne dikhlaayaa farangee ko mulookiyat kaa khvaab Main ne toDaa masjid-o-dair-o-kaleesaa kaa fusoon Main ne naadaaron ko sikhlaayaa sabaq taqdeer kaa Main ne mun.im ko diyaa sarmaaya daaree kaa junoon Kaun kar saktaa hai is kee aatish-e-sozaan ko sard Jis ke hangaamon men ho iblees kaa soz-e-daroon Jis kee shaakhen hon hamaaree aabiyaaree se buland Kaun kar saktaa hai is nakhl-e-kuhan ko sar-nigoon Pahlaa musheer Is men kya shak hai ki mohkam hai ye ibleesee nizaam Pukhta-tar is se hue khoo-e-ghulaamee men avaam Hai azal se in ghareebon ke muqaddar men sujood In kee fitrat kaa taqaazaa hai namaaz-e-be-qayaam Aarzoo avval to paidaa ho nahin saktee kaheen Ho kaheen paidaa to mar jaatee hai yaa rahtee hai khaam Ye hamaaree sa.ee-e-paiham kee karaamat hai ki aaj Soofee-o-mullaa mulookiyyat ke bande hain tamaam Tab-e-mashriq ke liye mauzoon yahee afyoon thee Varna qavvaalee se kuch kam-tar nahin ilm-e-kalaam Hai tavaaf-o-haj kaa hangaama agar baaqee to kya Kund ho kar rah ga.ee momin kee tegh-e-be-niyaam Kis kee nau-meedee pe hujjat hai ye farmaan-e-jadeed Hai jihaad is daur men mard-e-musalmaan par haraam Doosraa musheer Khair hai sulataanee-e-jamhoor kaa ghaughaa ki shar Too jahaan ke taaza fitnon se nahin hai baa-khabar Pahlaa musheer Huun magar meree jahaan-beenee bataatee hai mujhe Jo mulookiyat kaa ik parda ho kya is se khatar Ham ne khud shaahee ko pahnaayaa hai jamhooree libaas Jab zaraa aadam huaa hai khud-shanaas-o-khud-nigar Kaarobaar-e-shahryaaree kee haqeeqat aur hai Ye vajood-e-meer-o-sultaan par nahin hai munhasir Majlis-e-millat ho yaa parvez kaa darbaar ho Hai wo sultaan ghair kee khetee pe ho jis kee nazar Too ne kya dekhaa nahin maghrib kaa jamhooree nizaam Chehra raushan andaroon changez se taareek-tar Teesraa musheer Rooh-e-sultaanee rahe baaqee to phir kya iztiraab Hai magar kya is yahoodee kee sharaarat kaa javaab Vo kaleem-e-be-tajallee wo maseeh-e-be-saleeb Niist paighambar va-lekin dar baghal daarad kitaab Kyaa bataa.oon kya hai kaafir kee nigaah-e-parda-soz Mashriq-o-maghrib kee qaumon ke liye roz-e-hisaab Is se baDh kar aur kya hogaa tabee.at kaa fasaad ToD dee bandon ne aaqaaon ke khemon kee tanaab Chauthaa musheer ToD is kaa roomat-ul-kubraa ke aivaanon men dekh Aal-e-ceaser ko dikhaayaa ham ne phir ceaser kaa khvaab Kaun bahr-e-room kee maujon se hai lipTaa huaa Gaah baalad-choon-sanobar gaah naalad-choon-rubaab Teesraa musheer Main to is kee aaqibat-beenee kaa kuch qaa.il nahin Jis ne afrangee siyaasat ko kya yuun be-hijaab Paanchvaan musheer iblees ko mukhaatab kar ke Ai tire soz-e-nafas se kaar-e-aalam ustuvaar Too ne jab chaahaa kiyaa har pardagee ko aashkaar Aab-o-gil teree haraarat se jahaan-e-soz-o-saaz Ablah-e-jannat tiree ta.aleem se daanaa-e-kaar Tujh se baDh kar fitrat-e-aadam kaa wo mahram nahin Saada-dil bandon men jo mash.hoor hai parvardigaar Kaam tha jin kaa faqat taqdees-o-tasbeeh-o-tavaaf Teree ghairat se abad tak sar-nigoon-o-sharmsaar Garche hain tere mureed afrang ke saahir tamaam Ab mujhe un kee faraasat par nahin hai aitbaar Vo yahoodee fitna-gar wo rooh-e-mazdak kaa burooz Har qabaa hone ko hai is ke junoon se taar taar Zaagh dashtee ho raha hai ham-sar-e-shaaheen-o-chargh Kitnee sur.at se badaltaa hai mizaaj-e-rozgaar Chhaa ga.ee aashufta ho kar vus.at-e-aflaak par Jis ko naadaanee se ham samjhe the ik musht-e-ghubaar Fitna-e-fardaa kee haibat kaa ye aalam hai ki aaj Kaanpte hain kohsaar-o-murgh-zaar-o-jooebaar Mere aaqaa wo jahaan zer-o-zabar hone ko hai Jis jahaan kaa hai faqat teree siyaadat par madaar Iblis Ye anasir ka purana khel ye duniya-e-dun Sakinan-e-arsh-e-azam ki tamannaon ka KHun Is ki barbaadi pe aaj aamada hai wo karsaz Jis ne is ka nam rakha tha jahan-e-kaf-o-nun Main ne dikhlaya farangi ko mulukiyat ka KHwab Main ne toDa masjid-o-dair-o-kalisa ka fusun Main ne nadaron ko sikhlaya sabaq taqdir ka Main ne munim ko diya sarmaya dari ka junun Kaun kar sakta hai is ki aatish-e-sozan ko sard Jis ke hangamon mein ho iblis ka soz-e-darun Jis ki shaKHen hon hamari aabiyari se buland Kaun kar sakta hai is naKHl-e-kuhan ko sar-nigun Pahla mushir Is mein kya shak hai ki mohkam hai ye iblisi nizam PuKHta-tar is se hue KHu-e-ghulami mein awam Hai azal se in gharibon ke muqaddar mein sujud In ki fitrat ka taqaza hai namaz-e-be-qayam Aarzu awwal to paida ho nahin sakti kahin Ho kahin paida to mar jati hai ya rahti hai KHam Ye hamari sai-e-paiham ki karamat hai ki aaj Sufi-o-mulla mulukiyyat ke bande hain tamam Tab-e-mashriq ke liye mauzun yahi afyun thi Warna qawwali se kuch kam-tar nahin ilm-e-kalam Hai tawaf-o-haj ka hangama agar baqi to kya Kund ho kar rah gai momin ki tegh-e-be-niyam Kis ki nau-midi pe hujjat hai ye farman-e-jadid Hai jihad is daur mein mard-e-musalman par haram Dusra mushir KHair hai sulatani-e-jamhur ka ghaugha ki shar Tu jahan ke taza fitnon se nahin hai ba-KHabar Pahla mushir Hun magar meri jahan-bini batati hai mujhe Jo mulukiyat ka ek parda ho kya is se KHatar Hum ne KHud shahi ko pahnaya hai jamhuri libas Jab zara aadam hua hai KHud-shanas-o-KHud-nigar Karobar-e-shahryari ki haqiqat aur hai Ye wajud-e-mir-o-sultan par nahin hai munhasir Majlis-e-millat ho ya parwez ka darbar ho Hai wo sultan ghair ki kheti pe ho jis ki nazar Tu ne kya dekha nahin maghrib ka jamhuri nizam Chehra raushan andarun changez se tarik-tar Tisra mushir Ruh-e-sultani rahe baqi to phir kya iztirab Hai magar kya is yahudi ki shararat ka jawab Wo kalim-e-be-tajalli wo masih-e-be-salib Nist paighambar wa-lekin dar baghal darad kitab Kya bataun kya hai kafir ki nigah-e-parda-soz Mashriq-o-maghrib ki qaumon ke liye roz-e-hisab Is se baDh kar aur kya hoga tabiat ka fasad ToD di bandon ne aaqaon ke KHemon ki tanab Chautha mushir ToD is ka rumat-ul-kubra ke aiwanon mein dekh Aal-e-ceaser ko dikhaya hum ne phir ceaser ka KHwab Kaun bahr-e-rum ki maujon se hai lipTa hua Gah baalad-chun-sanobar gah nalad-chun-rubab Tisra mushir Main to is ki aaqibat-bini ka kuch qail nahin Jis ne afrangi siyasat ko kya yun be-hijab Panchwan mushir iblis ko muKHatab kar ke Ai tere soz-e-nafas se kar-e-alam ustuwar Tu ne jab chaha kiya har pardagi ko aashkar Aab-o-gil teri hararat se jahan-e-soz-o-saz Ablah-e-jannat teri talim se dana-e-kar Tujh se baDh kar fitrat-e-adam ka wo mahram nahin Sada-dil bandon mein jo mashhur hai parwardigar Kaam tha jin ka faqat taqdis-o-tasbih-o-tawaf Teri ghairat se abad tak sar-nigun-o-sharmsar Garche hain tere murid afrang ke sahir tamam Ab mujhe un ki farasat par nahin hai e'tibar Wo yahudi fitna-gar wo ruh-e-mazdak ka buruz Har qaba hone ko hai is ke junun se tar tar Zagh dashti ho raha hai ham-sar-e-shahin-o-chargh Kitni surat se badalta hai mizaj-e-rozgar Chha gai aashufta ho kar wusat-e-aflak par Jis ko nadani se hum samjhe the ek musht-e-ghubar Fitna-e-farda ki haibat ka ye aalam hai ki aaj Kanpte hain kohsar-o-murgh-zar-o-juebar Mere aaqa wo jahan zer-o-zabar hone ko hai Jis jahan ka hai faqat teri siyaadat par madar