jab ishq sikhaataa hai aadaab e khud aagaahii
— Allama Iqbal
Jab ishq sikhaataa hai aadaab-e-khud-aagaahee
Khulte hain ghulaamon par asraar-e-shahanshaahee
'attaar' ho 'roomee' ho 'raazee' ho 'ghazaalee' ho
Kuch haath naheen aataa be-aah-e-sahar-gaahee
Naumeed na ho in se ai rahbar-e-farzaana
Kam-kosh to hain lekin be-zauq naheen raahee
Ai taa.ir-e-laahautee us rizq se maut achchhee
Jis rizq se aatee ho parvaaz men kotaahee
Daaraa o sikandar se wo mard-e-faqeer aulaa
Ho jis kee faqeeree men boo-e-asadul-laahee
Aa.een-e-javaan-mardaan haq-goee o be-baakee
Allaah ke sheron ko aatee naheen roobaahee