jugnuu ki raushnii hai kaashaana e chaman men
— Allama Iqbal
Jugnoo kee raushnee hai kaashaana-e-chaman men
Yaa sham.a jal rahi hai phoolon kee anjuman men
Aayaa hai aasmaan se uD kar koi sitaara
Yaa jaan paD ga.ee hai mahtaab kee kiran men
Yaa shab kee saltanat men din kaa safeer aayaa
Ghurbat men aa ke chamkaa gumnaam tha vatan men
Takmaa koi giraa hai mahtaab kee qabaa kaa
Zarra hai yaa numaayaan suraj ke pairahan men
Husn-e-qadeem kee ik posheeda ye jhalak thee
Le aa.ee jis ko qudrat khalvat se anjuman men
ChhoTe se chaand men hai zulmat bhee raushnee bhee
Niklaa kabhi gahan se aayaa kabhi gahan men