kabhi ai haqiiqat e muntazar nazar aa libaas e majaaz men
— Allama Iqbal
Kabhee ai haqeeqat-e-muntazar nazar aa libaas-e-majaaz men
Ki hazaaron sajde taDap rahe hain miree jabeen-e-niyaaz men
Tarab-aashnaa-e-kharosh ho too navaa hai mahram-e-gosh ho
Wo sarod kya ki chhupaa huaa ho sukoot-e-parda-e-saaz men
Too bachaa bachaa ke na rakh ise tiraa aa.ina hai wo aa.ina
Ki shikasta ho to azeez-tar hai nigaah-e-aa.eena-saaz men
Dam-e-tauf kirmak-e-sham.a ne ye kahaa ki wo asar-e-kuhan
Na tiree hikaayat-e-soz men na miree hadees-e-gudaaz men
Na kaheen jahaan men amaan milee jo amaan milee to kahaan milee
Mire jurm-e-khaana-kharaab ko tire afv-e-banda-navaaz men
Na wo ishq men raheen garmiyaan na wo husn men raheen shokhiyaan
Na wo ghaznavee men taDap rahi na wo kham hai zulf-e-ayaaz main
Jo main sar-ba-sajda huaa kabhee to zameen se aane lagee sadaa
Tiraa dil to hai sanam-aashnaa tujhe kya milegaa namaaz men