khirad ke paas khabar ke sivaa Kuch aur nahin
— Allama Iqbal
Khirad ke paas khabar ke sivaa Kuch aur naheen
Tiraa ilaaj nazar ke sivaa Kuch aur naheen
Har ik maqaam se aage maqaam hai teraa
Hayaat zauq-e-safar ke sivaa Kuch aur naheen
Giraan-bahaa hai to hifz-e-khudee se hai varna
Guhar men aab-e-guhar ke sivaa Kuch aur naheen
Ragon men gardish-e-khoon hai agar to kya haasil
Hayaat soz-e-jigar ke sivaa Kuch aur naheen
Uroos-e-laala munaasib naheen hai mujh se hijaab
Ki main naseem-e-sahar ke sivaa Kuch aur naheen
Jise kasaad samajhte hain taajiraan-e-farang
Wo shai mata-e-hunar ke sivaa Kuch aur naheen
BaDaa kareem hai 'iqbaal'-e-be-navaa lekin
Ataa-e-shola sharar ke sivaa Kuch aur naheen