lenin ai anfus o aafaaq men paidaa tirii aayaat

Ai anfus o aafaaq men paidaa tiree aayaat Haq ye hai ki hai zinda o paa.inda tiree zaat Main kaise samajhtaa ki too hai yaa ki nahin hai Har dam mutaghayyar the khirad ke nazriyaat Mahram nahin fitrat ke surood-e-azlee se Beenaa-e-kavaakib ho ki daanaa-e-nabaataat Aaj aankh ne dekhaa to wo 'aalam huaa saabit Main jis ko samajhtaa tha kaleesaa ke khuraafaat Ham band-e-shab-o-roz men jakDe hue bande Too khaaliq-e-aasaar-o-nigaaranda-e-aanaat Ik baat agar mujh ko ijaazat ho to poochhoon Hal kar na sake jis ko hakeemon ke maqaalaat Jab tak main jiyaa khema-e-aflaak ke neeche KaanTe kee tarah dil men khaTaktee rahi ye baat Guftaar ke usloob pe qaaboo nahin rahtaa Jab ruuh ke andar mutalaatum hon khayaalaat Vo kaun saa aadam hai ki too jis kaa hai maa'bood Vo aadam-e-khaakee ki jo hai zer-e-samaavaat Mashriq ke khudaavand safedaan-e-rangee Maghrib ke khudaavand darakhshanda filizzaat Europe men bahut raushni-e-ilm-o-hunar hai Haq ye hai ki be-chashma-e-haivaan hai ye zulmaat Raanaa.i-e-taameer men raunaq men safaa men Girjon se kaheen baDh ke hain bankon kee imaaraat Zaahir men tijaarat hai haqeeqat men juaa hai Suud ek kaa laakhon ke liye marg-e-mufaajaat Ye 'ilm ye hikmat ye tadabbur ye hukoomat Piite hain lahoo dete hain taaleem-e-musaavaat Bekaaree o 'uryaanee o mai-khvaaree o iflaas Kyaa kam hain farangee madniyat kee futoohaat Vo qaum ki faizaan-e-samaavee se ho mahroom Had us ke kamaalaat kee hai barq o bukhaaraat Hai dil ke liye maut masheenon kee hukoomat Ehsaas-e-muravvat ko kuchal dete hain aalaat Aasaar to kuch kuch nazar aate hain ki aakhir Tadbeer ko taqdeer ke shaatir ne kiyaa maat Mai-khaana kee buniyaad men aayaa hai tazalzul BaiThe hain isee fikr men peeraan-e-kharaabaat Chehron pe jo surkhee nazar aatee hai sar-e-shaam Yaa ghaaza hai yaa saaghar o miinaa kee karaamaat Too qaadir o 'aadil hai magar tere jahaan men Hain talkh bahut banda-e-mazdoor ke auqaat Kab Doobegaa sarmaaya-parastee kaa safeena Duniyaa hai tiree muntazir-e-roz-e-mukaafaat Ai anfus o aafaq mein paida teri aayat Haq ye hai ki hai zinda o painda teri zat Main kaise samajhta ki tu hai ya ki nahin hai Har dam mutaghayyar the KHirad ke nazriyat Mahram nahin fitrat ke surud-e-azli se Bina-e-kawakib ho ki dana-e-nabaatat Aaj aankh ne dekha to wo 'alam hua sabit Main jis ko samajhta tha kalisa ke KHurafat Hum band-e-shab-o-roz mein jakDe hue bande Tu KHaliq-e-asar-o-nigaranda-e-anat Ek baat agar mujh ko ijazat ho to puchhun Hal kar na sake jis ko hakimon ke maqalat Jab tak main jiya KHema-e-aflak ke niche KanTe ki tarah dil mein khaTakti rahi ye baat Guftar ke uslub pe qabu nahin rehta Jab ruh ke andar mutalatum hon KHayalat Wo kaun sa aadam hai ki tu jis ka hai ma'bud Wo aadam-e-KHaki ki jo hai zer-e-samawat Mashriq ke KHudawand safedan-e-rangi Maghrib ke KHudawand daraKHshanda filizzat Europe mein bahut raushni-e-ilm-o-hunar hai Haq ye hai ki be-chashma-e-haiwan hai ye zulmat Ranai-e-tamir mein raunaq mein safa mein Girjon se kahin baDh ke hain bankon ki imaraat Zahir mein tijarat hai haqiqat mein jua hai Sud ek ka lakhon ke liye marg-e-mufajat Ye 'ilm ye hikmat ye tadabbur ye hukumat Pite hain lahu dete hain talim-e-musawat Bekari o 'uryani o mai-KHwari o iflas Kya kam hain farangi madniyat ki futuhat Wo qaum ki faizan-e-samawi se ho mahrum Had us ke kamalat ki hai barq o buKHaraat Hai dil ke liye maut mashinon ki hukumat Ehsas-e-murawwat ko kuchal dete hain aalat Aasar to kuch kuch nazar aate hain ki aaKHir Tadbir ko taqdir ke shatir ne kiya mat Mai-KHana ki buniyaad mein aaya hai tazalzul BaiThe hain isi fikr mein piran-e-KHarabaat Chehron pe jo surKHi nazar aati hai sar-e-sham Ya ghaza hai ya saghar o mina ki karamat Tu qadir o 'adil hai magar tere jahan mein Hain talKH bahut banda-e-mazdur ke auqat Kab Dubega sarmaya-parasti ka safina Duniya hai teri muntazir-e-roz-e-mukafat