majnuun ne shahr chhodaa to sahraa bhi chhod de
— Allama Iqbal
Majnoon ne shahr chhoDaa to sahraa bhee chhoD de
Nazzaare kee havas ho to lailaa bhee chhoD de
Vaa.iz kamaal-e-tark se miltee hai yaan muraad
Dunya jo chhoD dee hai to uqbaa bhee chhoD de
Taqleed kee ravish se to behtar hai khud-kushee
Rasta bhee DhoonD khizr kaa sauda bhee chhoD de
Maanind-e-khaama teree zabaan par hai harf-e-ghair
Begaana shai pe naazish-e-bejaa bhee chhoD de
Lutf-e-kalaam kya jo na ho dil men dard-e-ishq
Bismil naheen hai too to taDapnaa bhee chhoD de
Shabnam kee tarah phoolon pe ro aur chaman se chal
Is baagh men qayaam kaa sauda bhee chhoD de
Hai aashiqee men rasm alag sab se baiThnaa
But-khaana bhee haram bhee kaleesaa bhee chhoD de
Sauda-garee naheen ye ibaadat khuda kee hai
Ai be-khabar jazaa kee tamannaa bhee chhoD de
Achchhaa hai dil ke saath rahe paasbaan-e-aql
Lekin kabhee kabhee ise tanhaa bhee chhoD de
Jiinaa wo kya jo ho nafas-e-ghair par madaar
Shohrat kee zindagee kaa bharosaa bhee chhoD de
Shokhee see hai savaal-e-mukarrar men ai kaleem
Shart-e-razaa ye hai ki taqaazaa bhee chhoD de
Vaa.iz suboot laa.e jo mai ke javaaz men
'iqbaal' ko ye zid hai ki piinaa bhee chhoD de