march 1907

Zamaana aayaa hai be-hijaabee kaa aam deedaar-e-yaar hogaa Sukoot tha parda-daar jis kaa wo raaz ab aashkaar hogaa Guzar gaya ab wo daur-e-saaqee ki chhup ke piite the piine vaale Banegaa sara jahaan mai-khaana har koi baada-khvaar hogaa Kabhee jo aavaara-e-junoon the wo bastiyon men phir aa basenge Barahna-paa.ee vahee rahegee magar nayaa khaarzaar hogaa Sunaa diyaa gosh-e-muntazir ko hijaaz kee khaamushee ne aakhir Jo ahd sahraa.iyon se baandhaa gaya tha phir ustuvaar hogaa Nikal ke sahraa se jis ne ruumaa kee saltanat ko ulaT diyaa tha Sunaa hai ye qudsiyon se main ne wo sher phir hoshiyaar hogaa Kiyaa miraa tazkira jo saaqee ne baada-khvaaron kee anjuman men To peer-e-mai-khaana sun ke kahne lagaa ki munh-phaT hai khvaar hogaa Dayaar-e-maghrib ke rehne vaalo khuda kee bastee dukaan nahin hai Kharaa jise tum samajh rahe ho wo ab zar-e-kam-ayaar hogaa Tumhaaree tahzeeb apne khanjar se aap hee khud-kushee karegee Jo shaakh-e-naazuk pe aashiyaana banegaa naa-paa.edaar hogaa Safeena-e-barg-e-gul banaa legaa qaafila mor-e-naa-tavaan kaa Hazaar maujon kee ho kashaakash magar ye Dariya se paar hogaa Chaman men laala dikhaataa phirtaa hai daagh apna kalee kalee ko Ye jaantaa hai ki is dikhaave se dil-jalon men shumaar hogaa Jo ek tha ai nigaah too ne hazaar kar ke hamen dikhaayaa Yahee agar kaifiyat hai teree to phir kise aitbaar hogaa Kahaa jo qumree se main ne ik din yahaan ke aazaad paa-ba-gil hain Too ghunche kahne lage hamaare chaman kaa ye raazdaar hogaa Khudaa ke aashiq to hain hazaaron banon men phirte hain maare maare Main us kaa banda banoongaa jis ko khuda ke bandon se pyaar hogaa Ye rasm-e-bazm-e-fanaa hai ai dil gunaah hai jumbish-e-nazar bhee Rahegee kya aabroo hamaaree jo too yahaan be-qaraar hogaa Main zulmat-e-shab men le ke nikloongaa apne dar-maanda kaarvaan ko Sharar-fishaan hogee aah meree nafas miraa shola-baar hogaa Naheen hai ghair-az-numood kuch bhee jo mudda.aa teree zindagee kaa Too ik nafas men jahaan se miTnaa tujhe misaal-e-sharaar hogaa Na poochh 'iqbaal' kaa Thikaanaa abhee vahee kaifiyat hai us kee Kaheen sar-e-raah-guzaar baiThaa sitam-kash-e-intizaar hogaa Zamana aaya hai be-hijabi ka aam didar-e-yar hoga Sukut tha parda-dar jis ka wo raaz ab aashkar hoga Guzar gaya ab wo daur-e-saqi ki chhup ke pite the pine wale Banega sara jahan mai-KHana har koi baada-KHwar hoga Kabhi jo aawara-e-junun the wo bastiyon mein phir aa basenge Barahna-pai wahi rahegi magar naya KHarzar hoga Suna diya gosh-e-muntazir ko hijaz ki KHamushi ne aaKHir Jo ahd sahraiyon se bandha gaya tha phir ustuwar hoga Nikal ke sahra se jis ne ruma ki saltanat ko ulaT diya tha Suna hai ye qudsiyon se main ne wo sher phir hoshiyar hoga Kiya mera tazkira jo saqi ne baada-KHwaron ki anjuman mein To pir-e-mai-KHana sun ke kahne laga ki munh-phaT hai KHwar hoga Dayar-e-maghrib ke rehne walo KHuda ki basti dukan nahin hai Khara jise tum samajh rahe ho wo ab zar-e-kam-ayar hoga Tumhaari tahzib apne KHanjar se aap hi KHud-kushi karegi Jo shaKH-e-nazuk pe aashiyana banega na-paedar hoga Safina-e-barg-e-gul bana lega qafila mor-e-na-tawan ka Hazar maujon ki ho kashakash magar ye dariya se par hoga Chaman mein lala dikhata phirta hai dagh apna kali kali ko Ye jaanta hai ki is dikhawe se dil-jalon mein shumar hoga Jo ek tha ai nigah tu ne hazar kar ke hamein dikhaya Yahi agar kaifiyat hai teri to phir kise e'tibar hoga Kaha jo qumri se main ne ek din yahan ke aazad pa-ba-gil hain Tu ghunche kahne lage hamare chaman ka ye raazdar hoga KHuda ke aashiq to hain hazaron banon mein phirte hain mare mare Main us ka banda banunga jis ko KHuda ke bandon se pyar hoga Ye rasm-e-bazm-e-fana hai ai dil gunah hai jumbish-e-nazar bhi Rahegi kya aabru hamari jo tu yahan be-qarar hoga Main zulmat-e-shab mein le ke niklunga apne dar-manda karwan ko Sharar-fishan hogi aah meri nafas mera shola-bar hoga Nahin hai ghair-az-numud kuch bhi jo muddaa teri zindagi ka Tu ek nafas mein jahan se miTna tujhe misal-e-sharar hoga Na puchh 'iqbaal' ka Thikana abhi wahi kaifiyat hai us ki Kahin sar-e-rah-guzar baiTha sitam-kash-e-intizar hoga