na takht o taaj men ne lashkar o sipaah men hai

Na takht-o-taaj men ne lashkar-o-sipaah men hai Jo baat mard-e-qalandar kee baargaah men hai Sanam-kada hai jahaan aur mard-e-haq hai khaleel Ye nukta wo hai ki posheeda laa-ilaah men hai Vahee jahaan hai tiraa jis ko too kare paidaa Ye sang-o-khisht naheen jo tiree nigaah men hai Mah o sitaara se aage maqaam hai jis kaa Wo musht-e-khaak abhee aavaargaan-e-raah men hai Khabar milee hai khudaayaan-e-bahr-o-bar se mujhe Farang rahguzar-e-sail-e-be-panaah men hai Talaash us kee fazaaon men kar naseeb apna Jahaan-e-taaza miree aah-e-sub.h-gaah men hai Mire kadoo ko ghaneemat samajh ki baada-e-naab Na madrase men hai baaqee na khaanqaah men hai