na tuu zameen ke liye hai na aasmaan ke liye

Na too zameen ke liye hai na aasmaan ke liye Jahaan hai tere liye too naheen jahaan ke liye Ye aql o dil hain sharar shola-e-mohabbat ke Wo khaar-o-khas ke liye hai ye neestaan ke liye Maqaam-e-parvarish-e-aah-o-laala hai ye chaman Na sair-e-gul ke liye hai na aashiyaan ke liye Rahegaa raavee o niil o furaat men kab tak Tiraa safeena ki hai bahr-e-be-karaan ke liye Nishaan-e-raah dikhaate the jo sitaaron ko Taras ga.e hain kisee mard-e-raah-daan ke liye Nigah buland sukhan dil-navaaz jaan pur-soz Yahee hai rakht-e-safar meer-e-kaarvaan ke liye Zaraa see baat thee andesha-e-ajam ne use BaDhaa diyaa hai faqat zeb-e-daastaan ke liye Mire guloo men hai ik naghma jibra.eel-aashob Sambhaal kar jise rakkhaa hai laa-makaan ke liye