shikva kyuun ziyaan kaar banuun suud faraamosh rahuun

Kyuun ziyaan-kaar banoon sood-faraamosh rahoon Fikr-e-fardaa na karoon mahv-e-gham-e-dosh rahoon Naale bulbul ke sunoon aur hama-tan gosh rahoon Ham-navaa main bhee koi gul hoon ki khaamosh rahoon Jur.at-aamoz miree taab-e-sukhan hai mujh ko Shikva allaah se khaakam-ba-dahan hai mujh ko Hai bajaa sheva-e-tasleem men mash.hoor hain ham Qissa-e-dard sunaate hain ki majboor hain ham Saaz khaamosh hain fariyaad se maamoor hain ham Naala aataa hai agar lab pe to ma.azoor hain ham Ai khuda shikva-e-arbaab-e-wafa bhee sun le Khoogar-e-hamd se thoDaa saa gila bhee sun le Thee to maujood azal se hee tiree zaat-e-qadeem Phuul tha zeb-e-chaman par na pareshaan thee shameem Shart insaaf hai ai saahib-e-altaaf-e-ameem Boo-e-gul phailtee kis tarah jo hotee na naseem Ham ko jam.eeyat-e-khaatir ye pareshaanee thee Varna ummat tire mahboob kee deevaanee thee Ham se pahle tha ajab tere jahaan kaa manzar Kaheen masjood the patthar kaheen ma.abood shajar Khoogar-e-paikar-e-mahsoos thee insaan kee nazar Maantaa phir koi an-dekhe khuda ko kyoonkar Tujh ko ma.aloom hai letaa tha koi naam tiraa Quvvat-e-baazu-e-muslim ne kiyaa kaam tiraa Bas rahe the yaheen saljooq bhee tooraanee bhee Ahl-e-cheen chiin men eeraan men saasaanee bhee Isee maamoore men aabaad the yoonaanee bhee Isee dunya men yahoodee bhee the nasraanee bhee Par tire naam pe talvaar uThaa.ee kis ne Baat jo bigDee huee thee wo banaa.ee kis ne The hameen ek tire maarka-aaraaon men Khushkiyon men kabhi laDte kabhi dariyaaon men Diin azaanen kabhi europe ke kaleesaaon men Kabhee africa ke tapte hue sahraaon men Shaan aankhon men na jachtee thee jahaan-daaron kee Kalma paDhte the hameen Chaaon men talvaaron kee Ham jo jiite the to jangon kee museebat ke liye Aur marte the tire naam kee azmat ke liye Thee na kuch teghzanee apnee hukoomat ke liye Sar-ba-kaf phirte the kya dahr men daulat ke liye Qaum apnee jo zar-o-maal-e-jahaan par martee But-faroshee ke evaz but-shikanee kyuun kartee Tal na sakte the agar jang men aD jaate the Paanv sheron ke bhee maidaan se ukhaD jaate the Tujh se sarkash huaa koi to bigaD jaate the Tegh kya chiiz hai ham top se laD jaate the Naqsh-e-tauheed kaa har dil pe biThaayaa ham ne Zer-e-khanjar bhee ye paighaam sunaayaa ham ne Too hee kah de ki ukhaaDaa dar-e-khaibar kis ne Shahr qaisar kaa jo tha us ko kiyaa sar kis ne ToDe makhlooq khuda-vandon ke paikar kis ne KaaT kar rakh diye kuffaar ke lashkar kis ne Kis ne ThanDaa kiyaa aatish-kada-e-eeraan ko Kis ne phir zinda kiyaa tazkira-e-yazdaan ko Kaun see qaum faqat teree talabgaar huee Aur tere liye zahmat-kash-e-paikaar huee Kis kee shamsheer jahaangeer jahaan-daar huee Kis kee takbeer se dunya tiree bedaar huee Kis kee haibat se sanam sahme hue rahte the Munh ke bal gir ke hoo-allahu-ahad kahte the Aa gaya ain laDaa.ee men agar waqt-e-namaaz Qibla-roo ho ke zameen-bos huee qaum-e-hijaaz Ek hee saf men khaDe ho ga.e mahmood o ayaaz Na koi banda raha aur na koi banda-navaaz Banda o saahab o mohtaaj o ghanee ek hue Teree sarkaar men pahunche to sabhee ek hue Mahfil-e-kaun-o-makaan men sahar o shaam phire Mai-e-tauheed ko le kar sifat-e-jaam phire Koh men dasht men le kar tiraa paighaam phire Aur ma.aloom hai tujh ko kabhi naakaam phire Dasht to dasht hain Dariya bhee na chhoDe ham ne Bahr-e-zulmaat men dauDaa diye ghoDe ham ne Safha-e-dahr se baatil ko miTaayaa ham ne Nau-e-insaan ko ghulaamee se chhuDaayaa ham ne Tere ka.abe ko jabeenon se basaayaa ham ne Tere qur.aan ko seenon se lagaayaa ham ne Phir bhee ham se ye gila hai ki vafaadaar nahin Ham vafaadaar nahin too bhee to dildaar nahin Ummaten aur bhee hain un men gunahgaar bhee hain Ijz vaale bhee hain mast-e-mai-e-pindaar bhee hain Un men kaahil bhee hain ghaafil bhee hain hushyaar bhee hain SaikDon hain ki tire naam se be-zaar bhee hain Rahmaten hain tiree aghyaar ke kaashaanon par Barq girtee hai to bechaare musalmaanon par But sanam-khaanon men kahte hain musalmaan ga.e Hai khushee un ko ki ka.abe ke nigahbaan ga.e Manzil-e-dahr se oonTon ke hudee-khvaan ga.e Apnee baghlon men dabaa.e hue qur.aan ga.e Khanda-zan kufr hai ehsaas tujhe hai ki nahin Apnee tauheed kaa kuch paas tujhe hai ki nahin Ye shikaayat nahin hain un ke khazaane maamoor Naheen mahfil men jinhen baat bhee karne kaa shu.oor Qahr to ye hai ki kaafir ko milen huur o qusoor Aur bechaare musalmaan ko faqat waada-e-hoor Ab wo altaaf nahin ham pe inaayaat nahin Baat ye kya hai ki pahlee see mudaaraat nahin Kyuun musalmaanon men hai daulat-e-dunya naayaab Teree qudrat to hai wo jis kee na had hai na hisaab Too jo chaahe to uThe seena-e-sahraa se habaab Rah-rav-e-dasht ho sailee-zada-e-mauj-e-saraab Taan-e-aghyaar hai rusvaa.ee hai naadaaree hai Kyaa tire naam pe marne kaa evaz khvaaree hai Banee aghyaar kee ab chaahne vaalee dunya Rah ga.ee apne liye ek khayaalee dunya Ham to rukhsat hue auron ne sanbhaalee dunya Phir na kahnaa huee tauheed se khaalee dunya Ham to jiite hain ki dunya men tiraa naam rahe Kaheen mumkin hai ki saaqee na rahe jaam rahe Teree mahfil bhee ga.ee chaahne vaale bhee ga.e Shab kee aahen bhee ga.iin sub.h ke naale bhee ga.e Dil tujhe de bhee ga.e apna sila le bhee ga.e Aa ke baiThe bhee na the aur nikaale bhee ga.e Aa.e ushshaaq ga.e waada-e-fardaa le kar Ab unhen DhoonD charaagh-e-rukh-e-zebaa le kar Dard-e-lailaa bhee vahee qais kaa pahloo bhee vahee Najd ke dasht o jabal men ram-e-aahoo bhee vahee Ishq kaa dil bhee vahee husn kaa jaadoo bhee vahee Ummat-e-ahmad-e-mursil bhee vahee too bhee vahee Phir ye aazurdagi-e-ghair sabab kya ma.anee Apne shaidaaon pe ye chashm-e-ghazab kya ma.anee Tujh ko chhoDaa ki rasool-e-arabee ko chhoDaa But-garee pesha kiyaa but-shikanee ko chhoDaa Ishq ko ishq kee aashufta-saree ko chhoDaa Rasm-e-salmaan o uvais-e-qaranee ko chhoDaa Aag takbeer kee seenon men dabee rakhte hain Zindagee misl-e-bilaal-e-habashee rakhte hain Ishq kee khair wo pahlee see adaa bhee na sahee Jaada-paimaali-e-tasleem-o-razaa bhee na sahee Muztarib dil sifat-e-qibla-numaa bhee na sahee Aur paabandi-e-aa.een-e-wafa bhee na sahee Kabhee ham se kabhi ghairon se shanaasaa.ee hai Baat kahne kee nahin too bhee to harjaa.ee hai Sar-e-faaraan pe kiyaa diin ko kaamil too ne Ik ishaare men hazaaron ke liye dil too ne Aatish-andoz kiyaa ishq kaa haasil too ne Phoonk dee garmi-e-rukhsaar se mahfil too ne Aaj kyuun siine hamaare sharer-aabaad nahin Ham vahee sokhta-saamaan hain tujhe yaad nahin Vaadee-e-najd men wo shor-e-salaasil na raha Qais deevaana-e-nazzaara-e-mahmil na raha Hausle wo na rahe ham na rahe dil na raha Ghar ye ujDaa hai ki too raunaq-e-mahfil na raha Ai khushaa aan roz ki aa.ee o ba-sad naaz aa.ee Be-hijaabaana soo-e-mahfil-e-maa baaz aa.ee Baada-kash ghair hain gulshan men lab-e-joo baiThe Sunte hain jaam-ba-kaf naghma-e-koo-koo baiThe Daur hangaama-e-gulzaar se yaksoo baiThe Tere deevaane bhee hain muntazir-e-hoo baiThe Apne parvaanon ko phir zauq-e-khud-afrozee de Barq-e-dereena ko farmaan-e-jigar-sozee de Qaum-e-aavaara inaan-taab hai phir soo-e-hijaaz Le uDaa bulbul-e-be-par ko mazaaq-e-parvaaz Muztarib-e-baagh ke har ghunche men hai boo-e-niyaaz Too zaraa chheD to de tishna-e-mizraab hai saaz Naghme betaab hain taaron se nikalne ke liye Tuur muztar hai usee aag men jalne ke liye Mushkilen ummat-e-marhoom kee aasaan kar de Mor-e-be-maaya ko ham-dosh-e-sulaimaan kar de Jins-e-naayaab-e-mohabbat ko phir arzaan kar de Hind ke dair-nasheenon ko musalmaan kar de Joo-e-khoon mee chakad az hasrat-e-daireena-e-maa Mee tapad naala ba-nishtar kada-e-seena-e-maa Boo-e-gul le ga.ee bairoon-e-chaman raaz-e-chaman Kyaa qayaamat hai ki khud phuul hain ghammaaz-e-chaman Ahd-e-gul khatm huaa Toot gaya saaz-e-chaman UD ga.e Daaliyon se zamzama-pardaaz-e-chaman Ek bulbul hai ki mahv-e-tarannum ab tak Us ke siine men hai naghmon kaa talaatum ab tak Qumriyaan shaakh-e-sanobar se gurezaan bhee huiin Pattiyaan phuul kee jhaD jhaD ke pareshaan bhee huiin Vo puraanee raushen baagh kee veeraan bhee huiin Daaliyaan pairahan-e-barg se uryaan bhee huiin Qaid-e-mausam se tabee.at rahi aazaad us kee Kaash gulshan men samajhtaa koi fariyaad us kee Lutf marne men hai baaqee na maza jiine men Kuchh maza hai to yahee khoon-e-jigar piine men Kitne betaab hain jauhar mire aa.eene men Kis qadar jalve taDapte hain mire siine men Is gulistaan men magar dekhne vaale hee nahin Daagh jo siine men rakhte hon wo laale hee nahin Chaak is bulbul-e-tanhaa kee navaa se dil hon Jaagne vaale isee baang-e-daraa se dil hon Ya.anee phir zinda na.e ahd-e-wafa se dil hon Phir isee baada-e-daireena ke pyaase dil hon Ajamee khum hai to kya mai to hijaazee hai miree Naghma hindee hai to kya lai to hijaazee hai miree Kyun ziyan-kar banun sud-faramosh rahun Fikr-e-farda na karun mahw-e-gham-e-dosh rahun Nale bulbul ke sunun aur hama-tan gosh rahun Ham-nawa main bhi koi gul hun ki KHamosh rahun Jurat-amoz meri tab-e-suKHan hai mujh ko Shikwa allah se KHakam-ba-dahan hai mujh ko Hai baja shewa-e-taslim mein mashhur hain hum Qissa-e-dard sunate hain ki majbur hain hum Saz KHamosh hain fariyaad se mamur hain hum Nala aata hai agar lab pe to mazur hain hum Ai KHuda shikwa-e-arbab-e-wafa bhi sun le KHugar-e-hamd se thoDa sa gila bhi sun le Thi to maujud azal se hi teri zat-e-qadim Phul tha zeb-e-chaman par na pareshan thi shamim Shart insaf hai ai sahib-e-altaf-e-amim Bu-e-gul phailti kis tarah jo hoti na nasim Hum ko jamiyat-e-KHatir ye pareshani thi Warna ummat tere mahbub ki diwani thi Hum se pahle tha ajab tere jahan ka manzar Kahin masjud the patthar kahin mabud shajar KHugar-e-paikar-e-mahsus thi insan ki nazar Manta phir koi an-dekhe KHuda ko kyunkar Tujh ko malum hai leta tha koi nam tera Quwwat-e-bazu-e-muslim ne kiya kaam tera Bas rahe the yahin saljuq bhi turani bhi Ahl-e-chin chin mein iran mein sasani bhi Isi mamure mein aabaad the yunani bhi Isi duniya mein yahudi bhi the nasrani bhi Par tere nam pe talwar uThai kis ne Baat jo bigDi hui thi wo banai kis ne The hamin ek tere marka-araon mein KHushkiyon mein kabhi laDte kabhi dariyaon mein Din azanen kabhi europe ke kalisaon mein Kabhi africa ke tapte hue sahraon mein Shan aankhon mein na jachti thi jahan-daron ki Kalma paDhte the hamin chhanw mein talwaron ki Hum jo jite the to jangon ki musibat ke liye Aur marte the tere nam ki azmat ke liye Thi na kuch teghzani apni hukumat ke liye Sar-ba-kaf phirte the kya dahr mein daulat ke liye Qaum apni jo zar-o-mal-e-jahan par marti But-faroshi ke ewaz but-shikani kyun karti Tal na sakte the agar jang mein aD jate the Panw sheron ke bhi maidan se ukhaD jate the Tujh se sarkash hua koi to bigaD jate the Tegh kya chiz hai hum top se laD jate the Naqsh-e-tauhid ka har dil pe biThaya hum ne Zer-e-KHanjar bhi ye paigham sunaya hum ne Tu hi kah de ki ukhaDa dar-e-KHaibar kis ne Shahr qaisar ka jo tha us ko kiya sar kis ne ToDe maKHluq KHuda-wandon ke paikar kis ne KaT kar rakh diye kuffar ke lashkar kis ne Kis ne ThanDa kiya aatish-kada-e-iran ko Kis ne phir zinda kiya tazkira-e-yazdan ko Kaun si qaum faqat teri talabgar hui Aur tere liye zahmat-kash-e-paikar hui Kis ki shamshir jahangir jahan-dar hui Kis ki takbir se duniya teri bedar hui Kis ki haibat se sanam sahme hue rahte the Munh ke bal gir ke hu-allahu-ahad kahte the Aa gaya ain laDai mein agar waqt-e-namaz Qibla-ru ho ke zamin-bos hui qaum-e-hijaz Ek hi saf mein khaDe ho gae mahmud o ayaz Na koi banda raha aur na koi banda-nawaz Banda o sahab o mohtaj o ghani ek hue Teri sarkar mein pahunche to sabhi ek hue Mahfil-e-kaun-o-makan mein sahar o sham phire Mai-e-tauhid ko le kar sifat-e-jam phire Koh mein dasht mein le kar tera paigham phire Aur malum hai tujh ko kabhi nakaam phire Dasht to dasht hain dariya bhi na chhoDe hum ne Bahr-e-zulmat mein dauDa diye ghoDe hum ne Safha-e-dahr se baatil ko miTaya hum ne Nau-e-insan ko ghulami se chhuDaya hum ne Tere kabe ko jabinon se basaya hum ne Tere quran ko sinon se lagaya hum ne Phir bhi hum se ye gila hai ki wafadar nahin Hum wafadar nahin tu bhi to dildar nahin Ummaten aur bhi hain un mein gunahgar bhi hain Ijz wale bhi hain mast-e-mai-e-pindar bhi hain Un mein kahil bhi hain ghafil bhi hain hushyar bhi hain SaikDon hain ki tere nam se be-zar bhi hain Rahmaten hain teri aghyar ke kashanon par Barq girti hai to bechaare musalmanon par But sanam-KHanon mein kahte hain musalman gae Hai KHushi un ko ki kabe ke nigahban gae Manzil-e-dahr se unTon ke hudi-KHwan gae Apni baghlon mein dabae hue quran gae KHanda-zan kufr hai ehsas tujhe hai ki nahin Apni tauhid ka kuch pas tujhe hai ki nahin Ye shikayat nahin hain un ke KHazane mamur Nahin mahfil mein jinhen baat bhi karne ka shuur Qahr to ye hai ki kafir ko milen hur o qusur Aur bechaare musalman ko faqat wada-e-hur Ab wo altaf nahin hum pe inayat nahin Baat ye kya hai ki pahli si mudaraat nahin Kyun musalmanon mein hai daulat-e-duniya nayab Teri qudrat to hai wo jis ki na had hai na hisab Tu jo chahe to uThe sina-e-sahra se habab Rah-raw-e-dasht ho saili-zada-e-mauj-e-sarab Tan-e-aghyar hai ruswai hai nadari hai Kya tere nam pe marne ka ewaz KHwari hai Bani aghyar ki ab chahne wali duniya Rah gai apne liye ek KHayali duniya Hum to ruKHsat hue auron ne sanbhaali duniya Phir na kahna hui tauhid se KHali duniya Hum to jite hain ki duniya mein tera nam rahe Kahin mumkin hai ki saqi na rahe jam rahe Teri mahfil bhi gai chahne wale bhi gae Shab ki aahen bhi gain subh ke nale bhi gae Dil tujhe de bhi gae apna sila le bhi gae Aa ke baiThe bhi na the aur nikale bhi gae Aae ushshaq gae wada-e-farda le kar Ab unhen DhunD charagh-e-ruKH-e-zeba le kar Dard-e-laila bhi wahi qais ka pahlu bhi wahi Najd ke dasht o jabal mein ram-e-ahu bhi wahi Ishq ka dil bhi wahi husn ka jadu bhi wahi Ummat-e-ahmad-e-mursil bhi wahi tu bhi wahi Phir ye aazurdagi-e-ghair sabab kya mani Apne shaidaon pe ye chashm-e-ghazab kya mani Tujh ko chhoDa ki rasul-e-arabi ko chhoDa But-gari pesha kiya but-shikani ko chhoDa Ishq ko ishq ki aashufta-sari ko chhoDa Rasm-e-salman o uwais-e-qarani ko chhoDa Aag takbir ki sinon mein dabi rakhte hain Zindagi misl-e-bilal-e-habashi rakhte hain Ishq ki KHair wo pahli si ada bhi na sahi Jada-paimali-e-taslim-o-raza bhi na sahi Muztarib dil sifat-e-qibla-numa bhi na sahi Aur pabandi-e-ain-e-wafa bhi na sahi Kabhi hum se kabhi ghairon se shanasai hai Baat kahne ki nahin tu bhi to harjai hai Sar-e-faran pe kiya din ko kaamil tu ne Ek ishaare mein hazaron ke liye dil tu ne Aatish-andoz kiya ishq ka hasil tu ne Phunk di garmi-e-ruKHsar se mahfil tu ne Aaj kyun sine hamare sharer-abaad nahin Hum wahi soKHta-saman hain tujhe yaad nahin Wadi-e-najd mein wo shor-e-salasil na raha Qais diwana-e-nazzara-e-mahmil na raha Hausle wo na rahe hum na rahe dil na raha Ghar ye ujDa hai ki tu raunaq-e-mahfil na raha Ai KHusha aan roz ki aai o ba-sad naz aai Be-hijabana su-e-mahfil-e-ma baz aai Baada-kash ghair hain gulshan mein lab-e-ju baiThe Sunte hain jam-ba-kaf naghma-e-ku-ku baiThe Daur hangama-e-gulzar se yaksu baiThe Tere diwane bhi hain muntazir-e-hu baiThe Apne parwanon ko phir zauq-e-KHud-afrozi de Barq-e-derina ko farman-e-jigar-sozi de Qaum-e-awara inan-tab hai phir su-e-hijaz Le uDa bulbul-e-be-par ko mazaq-e-parwaz Muztarib-e-bagh ke har ghunche mein hai bu-e-niyaz Tu zara chheD to de tishna-e-mizrab hai saz Naghme betab hain taron se nikalne ke liye Tur muztar hai usi aag mein jalne ke liye Mushkilen ummat-e-marhum ki aasan kar de Mor-e-be-maya ko ham-dosh-e-sulaiman kar de Jins-e-nayab-e-mohabbat ko phir arzan kar de Hind ke dair-nashinon ko musalman kar de Ju-e-KHun mi chakad az hasrat-e-dairina-e-ma Mi tapad nala ba-nishtar kada-e-sina-e-ma Bu-e-gul le gai bairun-e-chaman raaz-e-chaman Kya qayamat hai ki KHud phul hain ghammaz-e-chaman Ahd-e-gul KHatm hua TuT gaya saz-e-chaman UD gae Daliyon se zamzama-pardaz-e-chaman Ek bulbul hai ki mahw-e-tarannum ab tak Us ke sine mein hai naghmon ka talatum ab tak Qumriyan shaKH-e-sanobar se gurezan bhi huin Pattiyan phul ki jhaD jhaD ke pareshan bhi huin Wo purani raushen bagh ki viran bhi huin Daliyan pairahan-e-barg se uryan bhi huin Qaid-e-mausam se tabiat rahi aazad us ki Kash gulshan mein samajhta koi fariyaad us ki Lutf marne mein hai baqi na maza jine mein Kuchh maza hai to yahi KHun-e-jigar pine mein Kitne betab hain jauhar mere aaine mein Kis qadar jalwe taDapte hain mere sine mein Is gulistan mein magar dekhne wale hi nahin Dagh jo sine mein rakhte hon wo lale hi nahin Chaak is bulbul-e-tanha ki nawa se dil hon Jagne wale isi bang-e-dara se dil hon Yani phir zinda nae ahd-e-wafa se dil hon Phir isi baada-e-dairina ke pyase dil hon Ajami KHum hai to kya mai to hijazi hai meri Naghma hindi hai to kya lai to hijazi hai meri