taariq ki duaa undulus ke maidaan e jang men
— Allama Iqbal
(undulus ke maidaan-e-jang men)
Ye ghaazee ye tere pur-asraar bande
Jinhen too ne bakhshaa hai zauq-e-khudaai
Do-neem un kee Thokar se sahraa o Dariya
SimaT kar pahaaD un kee haibat se raa.ee
Do-aalam se kartee hai begaana dil ko
Ajab chiiz hai lazzat-e-aashnaa.ee
Shahaadat hai matloob-o-maqsood-e-momin
Na maal-e-ghaneemat na kishvar-kushaa.ee
Khayaabaan men hai muntazir laala kab se
Qabaa chaahiye us ko khoon-e-arab se
Kiyaa too ne sahraa-nasheenon ko yaktaa
Khabar men nazar men azaan-e-sahar men
Talab jis kee sadiyon se thee zindagee ko
Vo soz us ne paayaa unheen ke jigar men
Kushaad-e-dar-e-dil samajhte hain us ko
Halaakat nahin maut un kee nazar men
Dil-e-mard-e-momin men phir zinda kar de
Vo bijlee ki thee naara-e-laa-tazar men
Azaa.em ko seenon men bedaar kar de
Nigaah-e-musalmaan ko talvaar kar de
(undulus ke maidan-e-jang mein)
Ye ghazi ye tere pur-asrar bande
Jinhen tu ne baKHsha hai zauq-e-KHudai
Do-nim un ki Thokar se sahra o dariya
SimaT kar pahaD un ki haibat se rai
Do-alam se karti hai begana dil ko
Ajab chiz hai lazzat-e-ashnai
Shahadat hai matlub-o-maqsud-e-momin
Na mal-e-ghanimat na kishwar-kushai
KHayaban mein hai muntazir lala kab se
Qaba chahiye us ko KHun-e-arab se
Kiya tu ne sahra-nashinon ko yakta
KHabar mein nazar mein azan-e-sahar mein
Talab jis ki sadiyon se thi zindagi ko
Wo soz us ne paya unhin ke jigar mein
Kushad-e-dar-e-dil samajhte hain us ko
Halakat nahin maut un ki nazar mein
Dil-e-mard-e-momin mein phir zinda kar de
Wo bijli ki thi nara-e-la-tazar mein
Azaem ko sinon mein bedar kar de
Nigah-e-musalman ko talwar kar de