wo harf e raaz ki mujh ko sikhaa gaya hai junoon

Wo harf-e-raaz ki mujh ko sikhaa gaya hai junoon Khuda mujhe nafas-e-jabra.eel de to kahoon Sitaara kya miree taqdeer kee khabar degaa Wo khud faraakhi-e-aflaak men hai khvaar o zuboon Hayaat kya hai khayaal o nazar kee majzoobee Khudee kee maut hai andesha-haa-e-goonaa-goon Ajab maza hai mujhe lazzat-e-khudee de kar Wo chaahte hain ki main apne aap men na rahoon Zameer-e-paak o nigaah-e-buland o masti-e-shauq Na maal-o-daulat-e-qaaroon na fikr-e-aflaatoon Sabaq milaa hai ye meraaj-e-mustafaa se mujhe Ki aalam-e-bashareeyat kee zad men hai gardoon Ye kaa.enaat abhee naa-tamaam hai shaayad Ki aa rahi hai damaadam sadaa-e-kun-fayakoon Ilaaj aatish-e-'roomee' ke soz men hai tiraa Tiree khirad pe hai ghaalib firangiyon kaa fusoon Usee ke faiz se meree nigaah hai raushan Usee ke faiz se mere suboo men hai jehoon