yaa rab ye jahaan e guzaraan khuub hai lekin

Yaa rab ye jahaan-e-guzaraan khuub hai lekin Kyuun khvaar hain mardaan-e-safaa-kesh o hunar-mand Go is kee khuda.ee men mahaajan kaa bhee hai haath Dunya to samajhtee hai farangee ko khudaavand Too barg-e-gayaahe na dahee ahl-e-khirad raa O kisht-e-gul-o-laala ba-bakhshad ba-khare chand Haazir hain kaleesaa men kabaab o mai-e-gulgoon Masjid men dharaa kya hai ba-juz mauiza o pand Ahkaam tire haq hain magar apne mufassir Taaveel se qur.aan ko banaa sakte hain paazand Firdaus jo teraa hai kisee ne nahin dekhaa Afrang kaa har qarya hai firdaus kee maanind Muddat se hai aavaara-e-aflaak miraa fikr Kar de ise ab chaand ke ghaaron men nazar-band Fitrat ne mujhe bakhshe hain jauhar-malakootee Khaakee hoon magar khaak se rakhtaa nahin paivand Darvesh-e-khuda-mast na sharqee hai na gharbee Ghar meraa na dillee na safaahaan na samarqand Kahtaa hoon vahee baat samajhtaa hoon jise haq Ne aabla-e-masjid hoon na tahzeeb kaa farzand Apne bhee khafaa mujh se hain begaane bhee naa-khush Main zahr-e-halaahal ko kabhi kah na sakaa qand Mushkil hai har ik banda-e-haq-been-o-haq-andesh Khaashaak ke tode ko kahe koh-e-damaavand Hoon aatish-e-namrood ke sho'lon men bhee khaamosh Main banda-e-momin hoon nahin daana-e-aspand Pur-soz nazar-baaz o niko-been o kam aazaar Aazaad o giraftaar o tahee kiisa o khursand Har haal men miraa dil-e-be-qaid hai khurram Kya chheenegaa ghunche se koi zauq-e-shakar-khand Chup rah na sakaa hazrat-e-yazdaan men bhee 'iqbaal' Kartaa koi is banda-e-gustaakh kaa munh band