zamaana aayaa hai be hijaabii kaa aam diidaar e yaar hogaa

Zamaana aayaa hai be-hijaabee kaa aam deedaar-e-yaar hogaa Sukoot tha parda-daar jis kaa wo raaz ab aashkaar hogaa Guzar gaya ab wo daur saaqee ki chhup ke piite the piine vaale Banegaa sara jahaan mai-khaana har koi baada-khvaar hogaa Kabhi jo aavaara-e-junoon the wo bastiyon men phir aa basenge Barahna-paa.ee vahee rahegee magar nayaa khaar-zaar hogaa Sunaa diyaa gosh-e-muntazir ko hijaaz kee khaamushee ne aakhir Jo ahd sahraa.iyon se baandhaa gaya tha phir ustuvaar hogaa Nikal ke sahraa se jis ne ruumaa kee saltanat ko ulaT diyaa tha Sunaa hai ye qudsiyon se main ne wo sher phir hoshiyaar hogaa Kiyaa miraa tazkira jo saaqee ne baada-khvaaron kee anjuman men To peer-e-mai-khaana sun ke kahne lagaa ki munh phaT hai khaar hogaa Dayaar-e-maghrib ke rehne vaalo khuda kee bastee dukaan nahin hai Kharaa jise tum samajh rahe ho wo ab zar-e-kam-ayaar hogaa Tumhaaree tahzeeb apne khanjar se aap hee khud-kushee karegee Jo shaakh-e-naazuk pe aashiyaana banegaa naa-paa.edaar hogaa Safeena-e-barg-e-gul banaa legaa qaafila mor-e-naa-tavaan kaa Hazaar maujon kee ho kashaakash magar ye Dariya se paar hogaa Chaman men laala dikhaataa phirtaa hai daagh apna kalee kalee ko Ye jaantaa hai ki is dikhaave se dil-jalon men shumaar hogaa Jo ek tha ai nigaah too ne hazaar kar ke hamen dikhaayaa Yahee agar kaifiyat hai teree to phir kise aitbaar hogaa Kahaa jo qamree se main ne ik din yahaan ke aazaad paa-ba-gil hain To ghunche kahne lage hamaare chaman kaa ye raazdaar hogaa Khuda ke aashiq to hain hazaaron banon men phirte hain maare maare Main us kaa banda banoongaa jis ko khuda ke bandon se pyaar hogaa Ye rasm-e-barham fanaa hai ai dil gunaah hai jumbish-e-nazar bhee Rahegee kya aabroo hamaaree jo too yahaan be-qaraar hogaa Main zulmat-e-shab men le ke nikloongaa apne darmaanda kaarvaan ko Shah nishaan hogee aah meree nafas miraa sho.ala baar hogaa Nahin hai ghair-az numood kuch bhee jo mudda.aa teree zindagee kaa Too ik nafas men jahaan se miTnaa tujhe misaal-e-sharaar hogaa Na poochh 'iqbaal' kaa Thikaana abhee vahee kaifiyat hai us kee Kaheen sar-e-rahguzaar baiThaa sitam-kash-e-intizaar hogaa