zauq o shauq qalb o nazar ki zindagii dasht men subh kaa samaan

Qalb o nazar kee zindagee dasht men sub.h kaa samaan Chashma-e-aaftaab se nuur kee naddiyaan ravaan! Husn-e-azal kee hai numood chaak hai parda-e-vajood Dil ke liye hazaar suud ek nigaah kaa ziyaan! Surkh o kabood badliyaan chhoD gaya sahaab-e-shab! Koh-e-izam ko de gaya rang-ba-rang tailisaan! Gard se paak hai havaa barg-e-nakheel dhul ga.e Reg-e-navaah-e-kaazima narm hai misl-e-parniyaan Aag bujhee huee idhar, TuuTee huee tanaab udhar Kyaa khabar is maqaam se guzre hain kitne kaarvaan Aa.ee sadaa-e-jibra.eel teraa maqaam hai yahee Ahl-e-firaaq ke liye aish-e-davaam hai yahee Kis se kahoon ki zahr hai mere liye mai-e-hayaat Kohna hai baz-e-kaa.inaat taaza hain mere vaardaat! Kyaa nahin aur ghaznavee kaargah-e-hayaat men BaiThe hain kab se muntazir ahl-e-haram ke somnaat! Zikr-e-arab ke soz men, fikr-e-ajam ke saaz men Ne arabee mushaahidaat, ne ajamee takhaiyyulaat Qaafilaa-e-hijaaz men ek husain bhee nahin Garche hai taab-daar abhee gesoo-e-dajla-o-furaat! Aql o dil o nigaah kaa murshid-e-avvaleen hai ishq Ishq na ho to shar-o-deen butkada-e-tasavvuraat! Sidq-e-khaleel bhee hai ishq sabr-e-husain bhee hai ishq! Ma.arka-e-vajood men badr o hunain bhee hai ishq! Aaya-e-kaa.enaat kaa ma.anee-e-der-yaab tuu! Nikle tiree talaash men qaafila-haa-e-rang-o-boo! Jalvatiyaan-e-madrasa kor-nigaah o murda-zauq Jalvatyaan-e-maikada kam-talab o tahee-kadoo! Main ki miree ghazal men hai aatish-e-rafta kaa suraagh Meree tamaam sarguzisht kho.e huon kee justujoo! Baad-e-sabaa kee mauj se nash-o-numaa-e-khaar-o-khas! Mere nafas kee mauj se nashv-o-numaa-e-aarzoo! Khoon-e-dil o jigar se hai meree navaa kee parvarish Hai rag-e-saaz men ravaan saahib-e-saaz kaa lahoo! Fursat-e-kashmukash men iin dil be-qaraar raa Yak do shikan zyaada kun gesoo-e-taabdaar raa Lauh bhee tuu, qalam bhee tuu, teraa vajood al-kitaab! Gumbad-e-aabgeena-rang tere muheet men habaab! Aalam-e-aab-o-khaak men tere zuhoor se farogh Zarra-e-reg ko diyaa too ne tuloo-e-aaftaab! Shaukat-e-sanjar-o-saleem tere jalaal kee numood! Faqr-e-'juned'-o-'baayazeed' teraa jamaal be-naqaab! Shauq tiraa agar na ho meree namaaz kaa imaam Meraa qayaam bhee hijaab! meraa sujood bhee hijaab! Teree nigaah-e-naaz se donon muraad paa ga.e Aql, ghayaab o justujoo ishq, huzoor o iztiraab! Teera-o-taar hai jahaan gardish-e-aaftaab se! Tab-e-zamaana taaza kar jalva-e-be-hijaab se! Teree nazar men hain tamaam mere guzishta roz o shab Mujh ko khabar na thee ki hai ilm-e-nakheel be-rutab! Taaza mire zameer men ma.arka-e-kuhan huaa! Ishq tamaam mustafaa! aql tamaam boo-lahab! Gaah ba-heela mee-barad, gaah ba-zor mee-kashad Ishq kee ibtidaa ajab ishq kee intihaa ajab! Aalam-e-soz-o-saaz men vasl se baDh ke hai firaaq Vasl men marg-e-aarzoo! hijr men lazzat-e-talab! Ain-e-visaal men mujhe hausla-e-nazar na tha Garche bahaana-joo rahi meree nigaah-e-be-adab! Garmee-e-aarzoo firaaq! shorish-e-haa-o-hoo firaaq! Mauj kee justujoo firaaq! qatre kee aabroo firaaq! Qalb o nazar ki zindagi dasht mein subh ka saman Chashma-e-aftab se nur ki naddiyan rawan! Husn-e-azal ki hai numud chaak hai parda-e-wajud Dil ke liye hazar sud ek nigah ka ziyan! SurKH o kabud badliyan chhoD gaya sahab-e-shab! Koh-e-izam ko de gaya rang-ba-rang tailisan! Gard se pak hai hawa barg-e-naKHil dhul gae Reg-e-nawah-e-kazima narm hai misl-e-parniyan Aag bujhi hui idhar, TuTi hui tanab udhar Kya KHabar is maqam se guzre hain kitne karwan Aai sada-e-jibrail tera maqam hai yahi Ahl-e-firaq ke liye aish-e-dawam hai yahi Kis se kahun ki zahr hai mere liye mai-e-hayat Kohna hai baz-e-kainat taza hain mere wardat! Kya nahin aur ghaznawi kargah-e-hayat mein BaiThe hain kab se muntazir ahl-e-haram ke somnat! Zikr-e-arab ke soz mein, fikr-e-ajam ke saz mein Ne arabi mushahidat, ne ajami taKHaiyyulat Qafila-e-hijaz mein ek husain bhi nahin Garche hai tab-dar abhi gesu-e-dajla-o-furaat! Aql o dil o nigah ka murshid-e-awwalin hai ishq Ishq na ho to shar-o-din butkada-e-tasawwuraat! Sidq-e-KHalil bhi hai ishq sabr-e-husain bhi hai ishq! Marka-e-wajud mein badr o hunain bhi hai ishq! Aaya-e-kaenat ka mani-e-der-yab tu! Nikle teri talash mein qafila-ha-e-rang-o-bu! Jalwatiyan-e-madrasa kor-nigah o murda-zauq Jalwatyan-e-maikada kam-talab o tahi-kadu! Main ki meri ghazal mein hai aatish-e-rafta ka suragh Meri tamam sarguzisht khoe huon ki justuju! Baad-e-saba ki mauj se nash-o-numa-e-KHar-o-KHas! Mere nafas ki mauj se nashw-o-numa-e-arzu! KHun-e-dil o jigar se hai meri nawa ki parwarish Hai rag-e-saz mein rawan sahib-e-saz ka lahu! Fursat-e-kashmukash mein in dil be-qarar ra Yak do shikan zyaada kun gesu-e-tabdar ra Lauh bhi tu, qalam bhi tu, tera wajud al-kitab! Gumbad-e-abgina-rang tere muhit mein habab! Aalam-e-ab-o-KHak mein tere zuhur se farogh Zarra-e-reg ko diya tu ne tulu-e-aftab! Shaukat-e-sanjar-o-salim tere jalal ki numud! Faqr-e-'juned'-o-'bayazid' tera jamal be-naqab! Shauq tera agar na ho meri namaz ka imam Mera qayam bhi hijab! mera sujud bhi hijab! Teri nigah-e-naz se donon murad pa gae Aql, ghayab o justuju ishq, huzur o iztirab! Tira-o-tar hai jahan gardish-e-aftab se! Tab-e-zamana taza kar jalwa-e-be-hijab se! Teri nazar mein hain tamam mere guzishta roz o shab Mujh ko KHabar na thi ki hai ilm-e-naKHil be-rutab! Taza mere zamir mein marka-e-kuhan hua! Ishq tamam mustafa! aql tamam bu-lahab! Gah ba-hila mi-barad, gah ba-zor mi-kashad Ishq ki ibtida ajab ishq ki intiha ajab! Aalam-e-soz-o-saz mein wasl se baDh ke hai firaq Wasl mein marg-e-arzu! hijr mein lazzat-e-talab! Ain-e-visal mein mujhe hausla-e-nazar na tha Garche bahana-ju rahi meri nigah-e-be-adab! Garmi-e-arzu firaq! shorish-e-ha-o-hu firaq! Mauj ki justuju firaq! qatre ki aabru firaq!