dil se khayaal e dost bhulaayaa na jaaegaa

Dil se khayaal-e-dost bhulaayaa na jaa.egaa Siine men daagh hai ki miTaayaa na jaa.egaa Tum ko hazaar sharm sahee mujh ko laakh zabt Ulfat wo raaz hai ki chhupaayaa na jaa.egaa Ai dil razaa-e-ghair hai shart-e-razaa-e-dost Zinhaar baar-e-ishq uThaayaa na jaa.egaa Dekhee hain aisee un kee bahut mehrbaaniyaan Ab ham se munh men maut ke jaayaa na jaa.egaa Mai tund o zarf-e-hausla-e-ahl-e-bazm tang Saaqee se jaam bhar ke pilaayaa na jaa.egaa Raazee hain ham ki dost se ho dushmanee magar Dushman ko ham se dost banaayaa na jaa.egaa Kyuun chheDte ho zikr na milne kaa raat ke Poochhenge ham sabab to bataayaa na jaa.egaa BigDen na baat baat pe kyuun jaante hain wo Ham wo nahin ki ham ko manaayaa na jaa.egaa Milnaa hai aap se to nahin hasr ghair par Kis kis se ikhtilaat baDhaayaa na jaa.egaa Maqsood apnaa kuchh na khulaa lekin is qadar Ya.anee wo DhoonDte hain jo paayaa na jaa.egaa JhagDon men ahl-e-deen ke na 'haalee' paDen bas aap Qissa huzoor se ye chukaayaa na jaa.egaa