gam e furqat hii men marnaa ho to dushvaar nahiin
— Altaf Hussain Hali
Gham-e-furqat hee men marnaa ho to dushvaar nahin
Shaadi-e-vasl bhee aashiq ko sazaa-vaar nahin
Khoob-rooee ke liye zishtee-e-khoo bhee hai zaroor
Sach to ye hai ki koi tujh saa tarah-daar nahin
Qaul dene men ta.ammul na qasam se inkaar
Ham ko sachchaa nazar aataa koi iqraar nahin
Kal kharaabaat men ik goshe se aatee thee sadaa
Dil men sab kuchh hai magar rukhsat-e-guftaar nahin
Haq huaa kis se adaa us kee vafaadaaree kaa
Jis ke nazdeek jafaa baa.is-e-aazaar nahin
Dekhte hain ki pahunchtee hai vahaan kaun see raah
Ka.aba o dair se kuchh ham ko sarokaar nahin
Honge qaa.il wo abhee matla-e-saanee sun kar
Jo tajallee men ye kahte hain ki takraar nahin