ghar hai vahshat khez aur bastii ujaad
— Altaf Hussain Hali
Ghar hai vahshat-khez aur bastee ujaaD
Ho ga.ee ek ik ghaDee tujh bin pahaaD
Aaj tak qasr-e-amal hai naa-tamaam
Bandh chukee hai baar-haa khul khul ke paaD
Hai pahunchnaa apnaa choTee tak muhaal
Ai talab niklaa bahut oonchaa pahaaD
Khelnaa aataa hai ham ko bhee shikaar
Par nahin zaahid koi TaTTee kee aaD
Dil nahin raushan to hain kis kaam ke
Sau shabistaan men agar raushan hain jhaaD
Iid aur nauroz hai sab dil ke saath
Dil nahin haazir to duniyaa hai ujaaD
Khet raste par hai aur rah-rau savaar
Kisht hai sarsabz aur neechee hai baaD
Baat vaa.iz kee koi pakDee ga.ee
In dinon kam-tar hai kuchh ham par lataaD
Tum ne 'haalee' khol kar naahaq zabaan
Kar liyaa saaree khudaa.ee se bigaaD