haq wafa ke jo ham jataane lage
— Altaf Hussain Hali
Haq wafa ke jo ham jataane lage
Aap kuchh kah ke muskuraane lage
Thaa yahaan dil men taan-e-vasl-e-adoo
Uzr un kee zabaan pe aane lage
Ham ko jiinaa paDegaa furqat men
Wo agar himmat aazmaane lage
Dar hai meree zabaan na khul jaa.e
Ab wo baaten bahut banaane lage
Jaan bachtee nazar nahin aatee
Ghair ulfat bahut jataane lage
Tum ko karnaa paDegaa uzr-e-jafaa
Ham agar dard-e-dil sunaane lage
Sakht mushkil hai sheva-e-tasleem
Ham bhee aakhir ko jee churaane lage
Jee men hai luun razaa-e-peer-e-mughaan
Qaafile phir haram ko jaane lage
Sirr-e-baatin ko faash kar yaa rab
Ahl-e-zaahir bahut sataane lage
Vaqt-e-rukhsat thaa sakht 'haalee' par
Ham bhee baiThe the jab wo jaane lage