jiite jii maut ke tum munh men na jaanaa hargiz

Jiite jee maut ke tum munh men na jaanaa hargiz Dosto dil na lagaanaa na lagaanaa hargiz Ishq bhee taak men baiThaa hai nazar-baazon kee Dekhnaa sher se aankhen na laDaanaa hargiz Haath malne na hon piiree men agar hasrat se To javaanee men na ye rog basaanaa hargiz Jitne raste the tire ho ga.e veeraan ai ishq Aa ke veeraanon men ab ghar na basaanaa hargiz Kuuch sab kar ga.e dillee se tire qadr-shanaas Qadr yaan rah ke ab apnee na ganvaanaa hargiz Tazkira dehli-e-marhoom kaa ai dost na chheD Na sunaa jaa.egaa ham se ye fasaana hargiz DhoonDtaa hai dil-e-shoreeda bahaane mutrib Dard-angez ghazal koi na gaanaa hargiz Sohbaten aglee musavvir hamen yaad aa.engee Koi dilchasp muraqqaa na dikhaanaa hargiz Le ke daagh aa.egaa siine pe bahut ai sayyaah Dekh is shahr ke khanDaron men na jaanaa hargiz Chappe chappe pe hain yaan gauhar-e-yaktaa tah-e-khaak Dafn hogaa kaheen itnaa na khazaana hargiz MiT ga.e tere miTaane ke nishaan bhee ab to Ai falak is se ziyaada na miTaanaa hargiz Wo to bhoole the hamen ham bhee unhen bhuul ga.e Aisa badlaa hai na badlegaa zamaana hargiz Ham ko gar too ne rulaayaa to rulaayaa ai charkh Ham pe ghairon ko to zaalim na hansaanaa hargiz Aakhiree daur men bhee tujh ko qasam hai saaqee Bhar ke ik jaam na pyaason ko pilaanaa hargiz Bakht so.e hain bahut jaag ke ai daur-e-zamaan Na abhee niind ke maaton ko jagaanaa hargiz Kabhi ai ilm o hunar ghar thaa tumhaaraa dillee Ham ko bhoole ho to ghar bhuul na jaanaa hargiz Shaa.iree mar chukee ab zinda na hogee yaaro Yaad kar kar ke use jee na kuDhaanaa hargiz 'ghaalib' o 'shefta' o 'nayyar' o 'aazurda' o 'zauq' Ab dikhaa.egaa ye shaklen na zamaanaa hargiz 'momin' o 'alvee' o 'sahbaa.ee' o 'mamnoon' ke baad Sher kaa naam na legaa koi daanaa hargiz Kar diyaa mar ke yagaanon ne yagaana ham ko Varna yaan koi na thaa ham men yagaana hargiz 'daagh' o 'majrooh' ko sun lo ki phir is gulshan men Na sunegaa koi bulbul kaa taraana hargiz Raat aakhir huee aur bazm huee zer-o-zabar Ab na dekhoge kabhi lutf-e-shabaana hargiz Bazm-e-maatam to nahin bazm-e-sukhan hai 'haalee' Yaan munaasib nahin ro ro ke rulaanaa hargiz