junoon kaar farmaa huaa chaahtaa hai

Junoon kaar-farmaa huaa chaahtaa hai Qadam dasht paimaa huaa chaahtaa hai Dam-e-girya kis kaa tasavvur hai dil men Ki ashk ashk dariyaa huaa chaahtaa hai Khat aane lage shikva-aamez un ke Milaap un se goyaa huaa chaahtaa hai Bahut kaam lene the jis dil se ham ko Wo sarf-e-tamannaa huaa chaahtaa hai Abhee lene paa.e nahin dam jahaan men Ajal kaa taqaazaa huaa chaahtaa hai Mujhe kal ke vaade pe karte hain rukhsat Koi va.ada puuraa huaa chaahtaa hai Fuzoon tar hai kuchh in dinon zauq-e-isyaan Dar-e-rahmat ab vaa huaa chaahtaa hai Qalaq gar yahee hai to raaz-e-nihaanee Koi din men rusvaa huaa chaahtaa hai Wafa shart-e-ulfat hai lekin kahaan tak Dil apnaa bhee tujh saa huaa chaahtaa hai Bahut haz uThaataa hai dil tujh se mil kar Qalaq dekhiye kya huaa chaahtaa hai Gham-e-rashk ko talkh samjhe the hamdam So wo bhee gavaaraa huaa chaahtaa hai Bahut chain se din guzarte hain 'haalee' Koi fitna barpaa huaa chaahtaa hai