kabk o qumrii men hai jhagdaa ki chaman kis kaa hai

Kabk o qumree men hai jhagDaa ki chaman kis kaa hai Kal bataa degee khizaan ye ki vatan kis kaa hai Faisla gardish-e-dauraan ne kiyaa hai sau baar Marv kis kaa hai badakhshaan o khutan kis kaa hai Dam se yoosuf ke jab aabaad thaa yaaqoob kaa ghar Charkh kahtaa thaa ki ye bait-e-huzan kis kaa hai Mutma.in is se musalmaan na maseehee na yahood Dost kya jaaniye ye charkh-e-kuhan kis kaa hai Vaa.iz ik aib se too paak hai yaa zaat-e-khudaa Varna be-aib zamaane men chalan kis kaa hai Aaj kuchh aur dinon se hai sivaa istighraaq Azm-e-taskheer phir ai shekh-e-zaman kis kaa hai Aankh paDtee hai har ik ahl-e-nazar kee tum par Tum men ruup ai gul o nasreen o saman kis kaa hai Ishq udhar aql idhar dhun men chale hain teree Rasta ab dekhiye donon men kaThin kis kaa hai Shaan dekhee nahin gar too ne chaman men us kee Valvala tujh men ye ai murgh-e-chaman kis kaa hai Hain fasaahat men masal vaa.iz o 'haalee' donon Dekhnaa ye hai ki be-laag sukhan kis kaa hai