kah do koii saaqii se ki ham marte hain pyaase
— Altaf Hussain Hali
Kah do koi saaqee se ki ham marte hain pyaase
Gar mai nahin de zahr hee kaa jaam balaa se
Jo kuchh hai so hai us ke taghaaful kee shikaayat
Qaasid se hai takraar na jhagDaa hai sabaa se
Dallaala ne ummeed dilaa.ee to hai lekin
Dete nahin kuchh dil ko tasallee ye dilaase
Hai vasl to taqdeer ke haath ai shah-e-khoobaan
Yaan hain to faqat teree mohabbat ke hain pyaase
Pyaase tire sar-gashta hain jo raah-e-talab men
HonTon ko wo karte nahin tar aab-e-baqaa se
Dar guzre davaa se to bharose pe duaa ke
Dar guzren duaa se bhee duaa hai ye khudaa se
Ik dard ho bas aaTh pahar dil men ki jis ko
Takhfeef davaa se ho na taskeen duaa se
'haalee' dil-e-insaan men hai gum daulat-e-kaunain
Sharminda hon kyuun ghair ke ehsaan-o-ataa se
Jab vaqt paDe deejiye dastak dar-e-dil par
Jhukiye fuqaraa se na jhamkiye umraa se