khuubiyaan apne men go be intihaa paate hain ham

Khoobiyaan apne men go be-intihaa paate hain ham Par har ik khoobee men daagh ik aib kaa paate hain ham Khauf kaa koi nishaan zaahir nahin afa.aal men Go ki dil men muttasil khauf-e-khudaa paate hain ham Karte hain taa.at to kuchh khvaahaan numaa.ish ke nahin Par gunah chhup chhup ke karne men mazaa paate hain ham Diida o dil ko khayaanat se nahin rakh sakte baaz Garche dast-o-paa ko aksar be-khataa paate hain ham Dil men dard-e-ishq ne muddat se kar rakkhaa hai ghar Par use aalooda-e-hirs-o-havaa paate hain ham Ho ke naadim jurm se phir jurm karte hain vahee Jurm se go aap ko naadim sadaa paate hain ham Hain fidaa un doston par jin men ho sidq o safaa Par bahut kam aap men sidq o safaa paate hain ham Go kisee ko aap se hone nahin dete khafaa Ik jahaan se aap ko lekin khafaa paate hain ham Jaante apne sivaa sab ko hain be-mehr o wafa Apne men gar shamma-e-mehr-o-wafa paate hain ham Bukhl se mansoob karte hain zamaane ko sadaa Gar kabhi taufeeq-e-eesaar o ataa paate hain ham Ho agar maqsad men naakaamee to kar sakte hain sabr Dard-e-khud-kaamee ko lekin be-davaa paate hain ham Thaharte jaate hain jitne chashm-e-aalam men bhale Haal nafs-e-doon kaa utnaa hee buraa paate hain ham Jis qadar jhuk jhuk ke milte hain buzurg o khurd se Kibr o naaz utnaa hee apne men sivaa paate hain ham Go bhalaa.ee karke ham-jinson se khush hotaa hai jee Tah-nasheen us men magar durd-e-riyaa paate hain ham Hai ridaa-e-nek-naamee dosh par apne magar Daagh rusvaa.ee ke kuchh zer-e-ridaa paate hain ham Raah ke taalib hain par be-raah paDte hain qadam Dekhiye kya DhoonDhte hain aur kya paate hain ham Nuur ke ham ne gale dekhe hain ai 'haalee' magar Rang kuchh teree alaapon men nayaa paate hain ham