us ke jaate hii ye kya ho gaii ghar kii suurat

Us ke jaate hee ye kya ho ga.ee ghar kee soorat Na wo deevaar kee soorat hai na dar kee soorat Kis se paimaan-e-wafa baandh rahee hai bulbul Kal na pahchaan sakegee gul-e-tar kee soorat Hai gham-e-roz-e-judaa.ee na nashaat-e-shab-e-vasl Ho ga.ee aur hee kuchh shaam-o-sahar kee soorat Apnee jebon se rahen saare namaazee hushyaar Ik buzurg aate hain masjid men khizar kee soorat Dekhiye shaikh musavvir se khiche yaa na khiche Soorat aur aap se be-aib bashar kee soorat Vaa.izo aatish-e-dozakh se jahaan ko tum ne Ye Daraayaa hai ki khud ban ga.e Dar kee soorat Kya khabar zaahid-e-qaane ko ki kya chiiz hai hirs Us ne dekhee hee nahin keesa-e-zar kee soorat Main bachaa teer-e-havaadis se nishaana ban kar AaDe aa.ee miree tasleem-e-sipar kee soorat Shauq men us ke mazaa dard men us ke lazzat Naaseho us se nahin koi mafar kee soorat Hamla apne pe bhee ik baad-e-hazeemat hai zaroor Rah ga.ee hai yahee ik fat.h o zafar kee soorat Rahnumaaon ke hue jaate hain ausaan khataa Raah men kuchh nazar aatee hai khatar kee soorat Yuun to aayaa hai tabaahee men ye beDaa sau baar Par Daraatee hai bahut aaj bhanvar kee soorat Un ko 'haalee' bhee bulaate hain ghar apne mehmaan Dekhnaa aap kee aur aap ke ghar kee soorat