amiir laakh idhar se udhar zamaana huaa

Amiir laakh idhar se udhar zamaana huaa Wo but wafa pe na aayaa main be-wafa na huaa Sar-e-niyaaz ko teraa hee aastaana huaa Sharaab-khaana huaa yaa qimaar-khaana huaa Huaa farogh jo mujh ko gham-e-zamaana huaa PaDaa jo daagh jigar men charaagh-e-khaana huaa Umiid jaa ke naheen us galee se aane kee Ba-rang-e-umr miraa naama-bar ravaana huaa Hazaar shukr na zaa.e' huee miree khetee Ki barq o sail men taqseem daana daana huaa Qadam huzoor ke aa.e mire naseeb khule Javaab-e-qasr-e-sulaimaan ghareeb-khaana huaa Tire jamaal ne zohra ko daur dikhlaayaa Tire jalaal se mirreekh kaa zamaana huaa Koee gaya dar-e-jaanaan pe ham hue paamaal Hamaaraa sar na huaa sang-e-aastaana huaa Farogh-e-dil kaa sabab ho ga.ee bujhee jo havas Sharaar-e-kushta se raushan charaagh-e-khaana huaa Jab aa.ee josh pe mere kareem kee rahmat Giraa jo aankh se aansoo dur-e-yagaana huaa Hasad se zahr tan-e-aasmaan men phail gaya Jo apnee kisht men sarsabz koee daana huaa Chune maheenon hee tinke ghareeb bulbul ne Magar naseeb na do roz aashiyaana huaa Khayaal-e-zulf men chhaa.ee ye teergee shab-e-hijr Ki khaal-e-chehra-e-zakhmee charaagh-e-khaana huaa Ye josh-e-girya huaa mere said hone par Ki chashm-e-daam ke aansoo se sabz daana huaa Na poochh naaz-o-niyaaz us ke mere kab se hain Ye husn o ishq to ab hai use zamaana huaa UThaa.e sadme pe sadme to aabroo paa.ee Amiir Toot ke dil gauhar-e-yagaana huaa