dil jo siine men zaar saa hai Kuch
— Ameer Minai
Dil jo siine men zaar saa hai Kuch
Gham se be-ikhtiyaar saa hai Kuch
Rakht-e-hastee badan pe Thiik nahin
Jaama-e-musta.aar saa hai Kuch
Chashm-e-nargis kahaan wo chashm kahaan
Nashsha kaisaa khumaar saa hai Kuch
Nakhl-e-ummeed men na phuul na phal
Shajar-e-be-bahaar saa hai Kuch
Saaqiyaa hijr men ye abr nahin
Aasmaan par ghubaar saa hai Kuch
Kal to aafat thee dil kee betaabee
Aaj bhee be-qaraar saa hai Kuch
Murda hai dil to gor hai siina
Daagh sham-e-mazaar saa hai Kuch
Is ko Dunya kee us ko khuld kee hirs
Rind hai Kuch na paarsaa hai Kuch
Pahle is se thaa hoshiyaar 'ameer'
Ab to be-ikhtiyaar saa hai Kuch