dil judaa maal judaa jaan judaa lete hain
— Ameer Minai
Dil judaa maal judaa jaan judaa lete hain
Apne sab kaam bigaD kar wo banaa lete hain
Ho hee rahtaa hai kisee but kaa nazaara taa-shaam
Sub.h ko uTh ke jo ham naam-e-khuda lete hain
Majlis-e-vaaz men jab baiThte hain ham mai-kash
Dukhtar-e-raz ko bhee pahloo men biThaa lete hain
Aise bose ke evaz maangte hain dil kya khuub
Jee men sochen to wo kya dete hain kya lete hain
Apnee mahfil se uThaa.e hain abas ham ko huzoor
Chupke baiThe hain alag aap kaa kya lete hain
But bhee kya chiiz hain allaah salaamat rakkhe
Gaaliyaan de ke ghareebon kee duaa lete hain
Shaakh-e-marjaan men javaahar nazar aate hain 'ameer'
Kabhee unglee jo wo daanton men dabaa lete hain