firaaq e yaar ne bechain mujh ko raat bhar rakkhaa

Firaaq-e-yaar ne bechain mujh ko raat bhar rakkhaa Kabhee takiya idhar rakkhaa kabhee takiya idhar rakkhaa Shikast-e-dil kaa baaqee ham ne ghurbat men asar rakhaa Likhaa ahl-e-vatan ko khat to ik gosha katar rakkhaa Baraabar aa.ine ke bhee na samjhe qadr wo dil kee Ise zer-e-qadam rakkhaa use pesh-e-nazar rakkhaa MiTaa.e deeda-o-dil donon mere ashk-e-khooneen ne 'ajab ye tifl abtar thaa na ghar rakkhaa na dar rakkhaa Tumhaare sang-e-dar kaa ek TukDaa bhee jo haath aayaa Aziiz aisa kiyaa mar kar use chhaatee pe dhar rakkhaa Jinaan men saath apne kyuun na le jaa.oongaa naaseh ko Sulook aisa hee mere saath hai hazrat ne kar rakkhaa Na kee kis ne sifaarish meree vaqt-e-qatl qaatil se Kamaan ne haath joDe tegh ne qadmon pe sar rakkhaa Ghazab barse wo mere aate hee maa'loom hota hai Jagah khaalee jo paa.ee yaar ko ghairon ne bhar rakkhaa BaDaa ehsaan hai mere sar pe us kee laghzish-e-paa kaa Ki is ne be-tahaashaa haath mere dosh par rakkhaa Zameen men daana-e-gandum sadaf men ham hue gauhar Hamaare ijz ne har ma.arka men ham ko dar rakkhaa Tire har naqsh-e-paa ko rahguzar men sajda-gah samjhe Jahaan too ne qadam rakkhaa vahaan main ne bhee sar rakkhaa Amiir achchhaa shagoon-e-mai kiyaa saaqee kee furqat men Jo barsaa abr-e-rahmat jaa-e-mai sheeshon men bhar rakkhaa