hai khamoshii zulm charkh e dev paikar kaa javaab
— Ameer Minai
Hai khamoshee zulm-charkh-e-dev-paikar kaa javaab
Aadmee hota to ham dete baraabar kaa javaab
Jo bagoolaa dasht-e-ghurbat men uThaa samjhaa ye main
Kartee hai taa'meer deevaanee mire ghar kaa javaab
Saath khanjar ke chalegee waqt-e-zab.h apnee zabaan
Jaan dene vaale dete hain baraabar kaa javaab
Sajda kartaa hoon jo main Thokar lagaataa hai wo but
Paanv us kaa baDh ke deta hai mire sar kaa javaab
Abr ke TukDe na uljhen meree mauj-e-ashk se
Khushk maghzon se hai mushkil misra-e-tar kaa javaab
Wo khinchaa tha main bhee khinch rahtaa to bantee kis tarah
Sar jhukaa deta tha qaatil tere khanjar kaa javaab
Jeete-jee mumkin nahin us shokh kaa khat dekhnaa
Baa'd mere aa.egaa mere muqaddar kaa javaab
Shaikh kahtaa hai brahman ko brahman us ko sakht
Kaa'ba o but-khaana men patthar hai patthar kaa javaab
Roz dikhlaataa hai gardoon kaisee kaisee sooraten
But-taraashee men hai ye kaafir bhee aazar kaa javaab
Har jagah qabr-e-gadaa takiye men har jaa gor-e-shaah
Ek ghar is shahr men hai doosre ghar kaa javaab
Jalva-gar hai noor-e-haq hone se yaktaa.ee 'ameer'
Saaya bhee hota agar hota payambar kaa javaab