hain na zindon men na murdon men kamar ke aashiq

Hain na zindon men na murdon men kamar ke aashiq Na idhar ke hain ilaahee na udhar ke aashiq Hai vahee aankh jo mushtaaq tire diid kee ho Kaan wo hain jo rahen teree khabar ke aashiq Jitne naavak hain kamaan-daar tire tarkash men Kuch mire dil ke hain Kuch mere jigar ke aashiq Barhaman dair se ka.abe se phir aa.e haajee Tere dar se na saraknaa thaa na sarke aashiq Aankh dikhlaao unhen marte hon jo aankhon par Ham to hain yaar mohabbat kee nazar ke aashiq Chhup rahe honge nazar se kaheen anqaa kee tarah Tauba kiije kaheen marte hain kamar ke aashiq Be-jigar ma.arka-e-ishq men kya Thahrenge Khaate hain khanjar-e-ma.ashooq ke charke aashiq Tujh ko ka.aba ho mubaarak dil-e-veeraan ham ko Ham hain zaahid usee ujDe hue ghar ke aashiq Kya huaa letee hain pariyaan jo balaa.en teree Ki paree-zaad bhee hote hain bashar ke aashiq Be-kasee dard-o-alam daagh tamannaa hasrat ChhoDe jaate hain pas-e-marg ye tarke aashiq Be-sabab sair-e-shab-e-maah naheen hai ye 'ameer' Ho ga.e tum bhee kisee rashk-e-qamar ke aashiq