ham lotte hain wo so rahe hain

Ham loTte hain wo so rahe hain Kya naaz-o-niyaaz ho rahe hain Kya rang jahaan men ho rahe hain Do hanste hain chaar ro rahe hain Dunya se alag jo ho rahe hain Takiyon men maze se so rahe hain Pahunchee hai hamaaree ab ye haalat Jo hanste the wo bhee ro rahe hain Tanhaa tah-e-khaak bhee nahin ham Hasrat ke saath so rahe hain Sote hain lahad men sone vaale Jo jaagte hain wo ro rahe hain Arbaab-e-kamaal chal base sab Sau men kaheen ek do rahe hain Palkon kee jhapak dikhaa ke ye but Dil men nashtar chubho rahe hain Mujh daagh-naseeb kee lahad par Laale kaa wo biij bo rahe hain Piiree men bhee ham hazaar afsos Bachpan kee niind sau rahe hain Daaman se ham apne daagh-e-hastee Aab-e-khanjar se do rahe hain Men jaag raha hoon a shab-e-gham Par mere naseeb sau rahe hain Ro.enge hamen rulaane vaale Doobenge wo jo Dubo rahe hain Ai hashr madeene men na kar shor Chup chup sarkaar sau rahe hain Aa.eene pe bhee kaDee nigaahen Kis par ye itaab ho rahe hain Bhaaree hai jo motiyon kaa maalaa AaTh aaTh aansoo wo ro rahe hain Dil chheen ke ho ga.e hain ghaafil Fitne wo jagaa ke sau rahe hain Hai ghair ke ghar jo in kee daavat Ham jaan se haath dho rahe hain Sad shukr khayaal hai usee kaa Ham jis se lipaT ke sau rahe hain Ho jaa.en na khushk daagh ke phuul Aansoo un ko bhigo rahe hain Aa.egee na phir ke umr-e-rafta Ham muft men jaan kho rahe hain Kya girya-e-be-asar se haasil Is rone pe ham to ro rahe hain Fariyaad ki naakhudaa-e-kashtee Kashtee ko miree Dubo rahe hain Kyon karte hain gham-gusaar takleef Aansoo mire munh ko dho rahe hain Mahfil barkhaast hai patange Rukhsat sham.on se ho rahe hain Hai kuuch kaa vaqt aasmaan par Taare kaheen naam ko rahe hain Un kee bhee numood hai koi dam Wo bhee na rahenge jo rahe hain Dunya kaa ye rang aur ham ko Kuch hosh nahin hai so rahe hain Thahro dam-e-naza.a do ghaDee aur Do chaar nafas hee to rahe hain Phuul un ko pinhaa pinhaa ke aghyaar KaanTe mire haq men bo rahe hain Zaanoo pe 'ameer' sar ko rakkhe Pahron guzre ki ro rahe hain