hans ke farmaate hain wo dekh ke haalat meri
— Ameer Minai
Hans ke farmaate hain wo dekh ke haalat meree
Kyuun tum aasaan samajhte the mohabbat meree
Ba.ad marne ke bhee chhoDee na rifaaqat meree
Meree turbat se lagee baiThee hai hasrat meree
Main ne aaghosh-e-tasavvur men bhee khenchaa to kahaa
Pis ga.ee pis ga.ee bedard nazaakat meree
Aa.eena sub.h-e-shab-e-vasl jo dekhaa to kahaa
Dekh zaalim ye thee shaam ko soorat meree
Yaar pahloo men hai tanhaa.ee hai kah do nikle
Aaj kyuun dil men chhupee baiThee hai hasrat meree
Husn aur ishq ham-aaghosh nazar aa jaate
Teree tasveer men khinch jaatee jo hairat meree
Kis DhiTaa.ee se wo dil chheen ke kahte hain 'ameer'
Wo miraa ghar hai rahe jis men mohabbat meree